Ralhrang A Ttanh Tu Chinmi Kan Rak Tam Tuk Ttung, Chinram Tanghra Phimi Cu An Tam Taktak Ee

Ralhrang A Ttanh Tu Chinmi Kan Rak Tam Tuk Ttung, Chinram Tanghra Phimi Cu An Tam Taktak Ee

Chin Ramkulh Tanghra Camipuai Phimi 2,824 An Si
============
2023|Vaute 9| SAC ralhrang kuttang 2023 cacawm kum ah Chin ralkulh huap in tanghra camipuai phi dingin minung 3461 nih cazin an pek nain minung 2824 lawng nih camipuai an tuah tiah kan theih.

Tu kum tanghra camipuai cu Chin ramkulh chung hmun 13 lawng ah tuah a si i Thantlang le Paletwa peng ah cun camipuai tuahmi an um lo. Atu kum dih in ca cawn mi a thar thelremhnak an tuah cang lai.

Nikum SAC ralhrang nih uknak an lak kum ah tanghra camipuai tuah mi minung 2259 an si i cu chungah minung 605 lawng an awng. Tukum tanghra camipuai cu March 8 ah an thok tiah theih a si. (Ref:Chin World)

Relchap>>>>CNF/A $25 Million Project Hi Thazaang Pe Hna Usih! Asinain Mipi Lunglak Khawh Nan i Zuam Ve Cu A Herh!
=======
Kum 2023 chungah miphun dothlennak le ralhrang kan tei khawhnak dingah CNF/A nih $25 million project an suai timi vun theih cu a ropui in tha a thơ tuk hringhran. Ralhrang teikhawhnak ding ahcun kan thapi kan chuah cio cu a herh hrimhrim ko, zaangzel in tuan ahcun mipi hi zahzah kan thih hlei ah kan sungh rih lai caah kih le kih, lum le lùm bakin biakhiahnak ngeih a herhmi asi ko.

CBCUSA nih 2022 chungah dothlennak caah le humanitarian caah Khrihfabu kip sinin 1/10 chungin 5% cu rak thawh a si, khuakip nih ting tampi vun thawh cio asi rih, pumpak in thơ mi an tampi rih. Kum 2023 caah CBCUSA nih 15% ah an kaiter, hi chung ah 10% cu dothlennak caah hman adang 5% cu ralzaam caah hman dingin suaisam asi. Khrihfabu kip nih 1/10 chungin biatak tein a vun dirkamh khawh ahcun $25 million project hi a tlamtling kho taktak lai zumh a um taktak ko.

Khrihfabu kip nih dirhkamh lo ahcun thilharsa taktak ding asi cang in ka hmu, a ruang cu mipi an cei tuk cang, theipar tam an hmuh rih lo caah a tha chiacangmi an tâm cang, mi a zum ti lomi an karh chin lengmang cang. Khrihfabu nih dirkamh lo ahcun $5 million hmanh hi kan hmuh khawh ti lai ka zum tuk ti lo, a ruang cu a cunglei ka tialmi nih khin kan thazaang a vun kan derter ngai cang caah a harsa ngai ko cang lai. Live tlangau le concert hrawng hin cun zeipipa a work tuk ti lai ka zum lo, a ruang cu kum 2 chungah kan kal cang i theihcia deuh lawngte ahkhan kan i nawlh lengmang bantuk asi in ka ruah.

CNF/A nihhin a riantuannak, a hriamnam le a cawlcanghnak tete hi thuh rumro i tim loin public ahhin vun langh taktak ve cang sehlaw mipi cu kan lung a thơ put than ko hnga. Thil hme in thil ngan tiang in thuh rumro in a thuh mi le mipi nih zeizei hmanh an theih khawh ti lo tikah, theipar um lomi riantuannak ah an ruah caah an mawh ve lo. “Van Ralvennak nan ti le pakhat zong kum 2 chungah nan cawk khawh mi a um tung lo, Thantlang helicopter pakhat hmanh nan thlak khawh tung lo, Meithal nan cawkmi zong kan hmuh tung lo, Meithal le zenkuan kan i zalo nan ti zungzal, $ million kan thawh mi cu teh?” timi comment pawl hi ka hmuh a tam taktak cang.

Be the first to comment

Leave a Reply

Your email address will not be published.


*