Vawlei cung tuanbia kan zoh lem lai lo. KIA le CNA/F hin zoh hna u sih law, a fiang bik lai dah! KIA le kawl ralkap pawl hi, daihnak lam kum 17 chung an rak tuah an ti. Cu daihnak kum 17 chung an rak tuah lio caan cu an ralkap thazaang a tlawmbik caan le an hriamnam a derbik caan a rak si an ti. Cucu a dikbakmi a si. Daihnak lam an kawlnak ah Ralkap/Hriamnam thazaang an rak chap ti lo.
Asinain cu daihnak lam an tuahmi a rawk in biatak tein thazaang an van la than i, Kawl ralkap he an i kah/do deuhdeuh tikah an thazaang a thawng chin lengmang. Nihin ni ahcun ral an tuk lengmang caah Kawl ralkap pi hmanh nih a tei kho ti hna lo. Cucu fiang tein hmuh khawhmi tuanbia a si.
CNA/F kong hi van zoh hmanh u sih! Kum 2012 in Jan 2021 tiang, van zoh u sih law, Kawl Ralkap he daihnak lam an zul ve. Cu daihnak lam an kawl cuahmah lio ahcun, CNA ralkap thazaang an chap kho bak lo. Cu lawng si loin hriamnam thazaang zong an rak chap kho ti lo. Cucu hopoh nih hmuh dih le theih dih a si. Phaisa zeimawzat zong an hmu ko nain daihnak lam caah an hmang dih. Cu tikah ralkap le hriamnam a thangcho kho ti lo.
Asinain, Min Aung Hlaing nih Uknak a van fir hnu cun Sa le ral kan si cang caah raldoh/Raltuk a hau cang. CNA/F nih raldoh/Raltuk a van i timh taktak cu, van zoh hmanh u sih, Vantawng in an thawng colh. CNA nih a luancia kum 33 hriam an tlaihmi nak in tutan raldoh/raltuk an van i thawk thal 5 chung an thawng ning hi a rang deuh! (CNA/F hi thlanga chungah van an tawng, An thazaang/hriamnam an thawng taktak colh)
Minung thazaang siseh, Hriamnam thazaang siseh, Ramchung ramleng si u sih, kan dihlak thinlungkhat in kan van cawlcang cio hna cu, Kawl ralkap nih zenhmi miphun ah a hong chuak colh! Kan bia donghnak lei a fiangmi cu, Raldoh/Raltuk hi thazaang tawnnak bak a si ti hi fiang tein hmuh khawh a si.
Relchih Bak Dingmi:- Chin ram cu kan hmunhma a si bantuk in Kawl ralhrang hi zoh sawhsawh kan tim ti hna lo. Tahchunhnak ah Khualhringtlang khua 13 an zam dih an timi khi, Nu nau, ngakchia le tar deuh hi a zammi an si hna, Khua Mino hrimhrim a hohmanh zam an duh lo. Min Aung Hlaing ralkap bak a bawmhmi an tam tuk.
Tutan ah Thantlang peng khualhring tlangah a hongkaimi Kawl ralkap cu an lungmit cang. An i timh ning bantuk a rak si lo. CDF/CNA le Mipi nih an rak phomh hna cu a hmun ah 17 bak an hrilh ko hna. A dang vialte cu hnu an tolh dih i, zamnak lawng an kawl.
Cu tikah an hawi le Ralkap Sopum ummi nih an van zuan hnawh hna nain, an fuh ngam nemmam hna lo. Ngalrual bang ramtang ah a tu hi an vai ko. Lam le sul in an kal ngam ti lo. Lam le sul in kan kal ahcun CDF/CNA nih an kan phomh lai ti hi an tih tuk cang. Cucaah hrolkuang le bua lak (Lam lo) lawng tein ramsa hliam bang lam hmanh an zawh ngam ti lo.
Tutan cu Chin ram ah teinak kan hmu hrimhrim lai. Chin Miphun cu Pathian nih umpi mi kan si. Kan mino vialte le CDF/CNA nih hnu tolh an i tim ti lo. Kawl ralkap nih hin an tih tuk hna ti a fiang tuk nain, Cung lei nawlpekmi cu an el ngam lo caah a si. Kawl ralkap nih hin Chin Miphun le CDF/CNA hi a rak kan zenh tuk cang ti a fiang, Nain Chin pasaltha daithlang lo tein, Hi misual hi rak bawh peng ko hna uh. Teinak kan hmu hrimhrim lai. Bawipa nih umpi mi Miphun kan si.
Leave a Reply