Pyithu Hluttaw Le Chin State Hluttaw Le Cun Amyota Hluttaw An i Dan Nak: By Zasang Cinzah

Vanlal Siam@ “Pyithu Hluttaw le Chin state hluttaw le cun Amyota hluttaw an ii dan nak kan chim law a tha men lai keizong kai fiang ve hna lo”

Lehnak: Tulio Myanmar cozah nih an hmanmi phunghrampi cu 2008 phunghrampi tiah kan theihmi, ralkap nih kum 7 chung an ser i 2008 ah an nunter i 2010 ah an hman colhmi kha a si. 2008 phunghrampi ning in Myanmar uknak system cu a tawinak in hitihin a si.

2008 phunghrampi ning in “Legislature Branch” le “Excutive Branch” tiah an tthen i, Legislature Branch cu ” The Pyidaungsu Hluttaw” tiah an auh. Mirang holh cun “Assembly of Union” ti a si. Mah The “Pyidaungsu Hluttaw” hi phu hnih in an tthen tthan i, “Pyithu Hluttaw” le “Amyotha Hluttaw” tiah an auh. Mirang holh cun Pyithu Hluttaw hi “Lower House” an ti i, Amyotha Hluttaw hi “Upper houase” an ti. Pyithu Hluttaaw ahhin MPs seat 440 a um i, Amyotha Hluttaw ahhin MPs seat 224 a um.

“Pyithu Hluttaw/ Lower House” ah a thu dingmi MPs cu “township/ Peng” cio in aiawh pakhat an thimmi paoh hika Pyithu Hluttaw ahhin an tthu. Chin State ahhin peng/township 9 a um caah MPs thutnak hmun 9 kan ngei ve. Cucaah ahcun, Pyithu Hluttaw caah MPs cu peng/township aiawh an si.

“Amyotha Hluttaw/ Upper House” ah a tthu dingmi MPs cu miphun aiawh MPs an si. Cucaah, Amyotha Hluttaw cu, mirang holh in “House of Nationalities” ti zong in an auh. Miphun aiawh PM thutnak ah a thu hnga dingmi cu, “State” pakhat ah MPs 12 cio an pek hna. Cucaah, kanmah Chin State nih seats 12 kan ngei ve. Cucaah, mah seats 12 cu “Township” pakhat ah aiawh MP pakhat cio phawt an si i, a hleimi 3 hi “Tedim, Hakha le Palewah” hi milu tam deuhnak an si caah 1 cio an chap hna. Amyotha Hluttaw MP cu Miphun aiawh MPs ti khawh an si.

Lower le Upper fawnh, “Pyidaungsu Hluttaw” ah MPs tambik a ngeimi nih Cozah an dirh i, anmah nih Excutive Branch cu ralkap he ibamwh in an tlaih. Cucaah, kawlram ahcun Mipi nih Pyithu le Amyotha Hluttaw PM kan thim hna i, a tlingmi MP nih President an thim tthan. Cucaah, a fawinak cun, MP tambik a ngeimi nih President an tlaih i Executive Branch zong anmah nih an ser i an tlaih.

Asi ahcun, Chin State Hluttaw tah? Chin State Hluttaw hi a dangte a si. Ram dang ahcun, State cozah hi a dang tein thimnak an tuah i a fiang ngai. Chin State Hluttaw cu, Chin State uktu MPs an si ve. 2008 phunghrampi thiam nih Chin State i uk ning hi a kan ttial piak. Chin State Hluttaw ahhin MPs seat 24 an chiah. Ralkap caah 6 an chiah i, a dang 18 hi Myone/Township pakhat ah MPs seat 2 cio an kan pek. Chin State ah Myone 9 a um i, 2 cio kan ting.

 200 total views,  1 views today

This function has been disabled for Chin 11 News.