Pu Trump Nih USA Mipi Caah Sa Thah Nak Kong Le Sa Ei Nak Kong Phungthar A Chuah

Pu Trump nih Americans pawl saa-dah ( protein) pehzulh tein an ngah khawh nakhnga cawsa thah/tuahnak, voksa thah/tuahnak/ arsa thah/tuahnak company pawl cu khar lo dingin nawl zulh dingin upadi ( defense production act) ka chuah a ti. Mah nih a sawh duhmi cu mah sa thah/tuahnak riantuantu hna minung zeizat hmanh khi Covid-19 zawtnak nih tlungh hmanh hna sehlaw company nan khar kho lo tinak a si.

Hi nawl zulh dingin a chuahmi nih Chin miphun a kan denkhon ngai kho. A ruang cu sa thahnak Tyson, JPS tibantuk company ah a tuanmi ah hin Chin miphun an tam taktak.

Nihnih ni tiangah khan sa thah/tuahnak ah a tuanmi minung 4400 hi Covid-19 zawtnak an ngei tiin theih an si, mah chungah minung 18 an thi cang ti a si.

Hi cazin zoh tikah sa thah/tuahnak a tuanmi hna hi an i chawnh ngaingai hna ti khawh a si.

Company nih cun an riantuantu hna paoh taklinh maw, khuasik maw, hromfak maw , khuh khuh maw ti cu an chek ko hna lai. Nain Covid-19 zawtnak hi zawtnak langh lo zongin um khawh a si thiam caah a poi ngai.

Azeiti si zongah Tyson, JBS tibantuk sa thah/tuahnak ah a tuahmi hna nih off day, vacation lakding nan ngeih ahcun lak rih ah a tha. A si khawh chungin inn ah ierh tlukin a thami a um lo. Nain minung pumpak pakhat cio ruahning cu a dan kho.

Pu Trump nih nawl a chuahmi hi a nung le nung kho taktak lai maw/ lo chim khawh a si rih lo. Biaceihtu pawl nih a nawl chuahmi kongah an ceih lai i a nung le nung lo bia an khiah te lai. Biaceihtu pawl cungah biakhiahnak nawl a phan te lai.

Ruah awk a um ngaimi cu ziah mah nawl zulh ding hna hi a chuah hnga? Caw sa ei lo ruang a thimi nan theih bal hna maw? Sa thahnak pakhat khat ah a tuanmi ah hin Pu Trump fale tuan ve hna sehlaw hi bantuk Covid-19 zawtnak a zual lio ah mah nawl zulh ding hi a chuah hnga maw? Zeizong vialte nakin nunnak le humhimnak ca hi ziah a biapi deuh lo maw? Khuate lei saram zua pawl hi Pu Trump a tanhtu an tam caah maw a si hnga? Sa thahnak an khar ahcun saram pawl zuarnak a um lai lo caah 2020 ithimnak ah za cikcek cang seh an ka ti lai ti a phang caah maw a si hnga?

A zeizei a va si zongah kan theih peng ding a herhmi cu caw sa ei lo zongah kan nung kho ko . Hihi cu kan pom khawh cio ko hna lai dah.

Source: Lewisville Chin Thawngpang Buk

 240 total views,  1 views today

This function has been disabled for Chin 11 News.