Pu No Than Kap Chimmi Hi Ruah Awk Ngai A Um!

HMAN THIAM AHCUN THAZANG CAKTUK KAN NEI!

Chin Party tivek men ziang hman a si lo. Kawl party tumpi ih um loin ziang pipa tuah a theih lo. KIA, AA le UWSA tluk Ralkap kan neih a tul. Annih tluk Ralkap neih lo cun zianghman kan tuah taktak thei lo ding, tvk, authawm theih ding a um theu.

Riahsiatzain, Myanmar ram hrimhrim hi, India bangin a nemzawng (non violence) thawn independence ngah si loin, hriamhrei thazang (violence) hmangin independence ngah kan si ruangah (Aungsan ho Ralkap 30 hruainak in), tu tiangin, hriamhrei thazang lawng rinsan in mai duhmi ngah theih ah kan ruat phah thluh. Hiruangah Kawlram Prime Minister hmaisa bik Dr Bamaw in, beidawngzet in, “minopawl lungthin ah hriamhrei kaih lawng hi Miphun duhdawt ah an ruat zo,” tin a rak aihram phah! Mipum tambik le rampum uktu Kawlpawl in, an Ralkap thazang hmangin ro an rel rero fawn tikah, Tlangmi hrang tiangin “Hriamhrei kaih cu Nunphung (culture) pakhat” vek ah a cang.

Cutikah, Politics ramthu reltlang tikah siseh, daihnak le lungrualnak reltlang tikah siseh, thanso thu reltlang tikah siseh, hriamhrei kai Kawl le Tlangmi Ralkap zaten, duhsak cuang an si, zoh san deuh an si, miphun hmailam hrang lairel theitu umsun vekin hmuh an si fawn. Mino tampi thinlung khalah hriamhrei kaih lawng hi ram le miphun duhdawt a si timi ruahnak a lut phah.

2010 le 2015 hnu talah, democracy danih mipi duhmi MP hrilnak ihsin a nemzawng (non violence) thazang hmang in mai duhmi langter ih rorel a si thlang ding ti a sinan, Zakhaing le Shan ah mipi hrilmi cozah an dinter Duh lo ruangah, hriamhrei lo cun a ngah lo, timi lungput a suak thar bet lala. A pawi ko.

HRIAMHREI SILO THAZANG DANG KAN NEI MAW? Tlangmi in kan Miphun humhalh ih cawisang dingah, Hriamhrei si lo thazang dang neihmi kan nei maw? Nei e. Kan nei ṭha lutuk. Hmanseh hmual neizet in hman kan thiam hrih lo. Hman thiam ahcun hriamhrei hnak hman in thazang cak sawn a si thei. Cui thazang cak maksak cu ziangbik a si, ziangtin kan hmang ding?

THAZANG MAKSAK; Democracy dan in kum 5 dan hrilawk kan neih tikah, zalen zetih mai lungduh hril theinak kan neih mi kan covo “vote, me” hi kan cahnak thazang maksak a si. Himi vote kan hman thiam a sile, kan ruah dah lomi le beisei ban lomi tiang hmuh le ngah a theih. Kan miphun kilhim in kan cawisang thei fawn.

THAZANG HMAN THIAM; Myanmar ramsung Tlangram miphun 7 hin (Chin telin), mai miphun party lawngah, mipi zate 100% in vote pe sehla, thil ra cang thei cu; Kum hnih khat sungah milian le nunnuam ah kan can phah lo hmanah, Miphun zah um le upat tlak ah in khaisang tengteng. Sumsaw le lennak hnak hmanin, miphun “Zah um le Upat tlak” si thei hi uanpi tlak miphun “Cawisang tu” a si. Kawl in an ralkap le mipum tamnak thazang thawn in ukneh hmanseh, kan thinlung cu in uk thei lo ti an theih phah ding, kan uar le upat mi miphun an silo ti an theih phah ding, uk ringring tlak men miphun ih in zoh niamnak lungthin khal kan cemter thei ding.

Himi dikzia cu 2015 hrilawk ah, 80% mai miphun Party ih vote pe Zakhaing dinhmun zohin theih a theih. 2015 ah Central Cozah (Kawl) in Zakhaing mipi 80% ih hrilmi party cu Cozah an dinter duh lo nan, an thinlung sungin Zakhaing cu an upat, an ngaisang, an ṭihzah, an tlon rero ti zep theih a silo. Hihi Zakhaing State hrang kum tin paisa an pek tamdan zohin a lang. Kawl hin nuai cimit thluh nuam in Zakhaing hi an huazet nan an thinlung sung cun an ṭihzah, an tlon rero ti a fiang (Chin in zoh dan thaw cun lei le van).

2020 hrilawk ah Chinmi lakin Hnamdang Party ah MP cuhtu Pakhat hman um lo, vote thlak tik khalah Chinmi 100% a si lo hmanah 90% talin Miphun Party lawng vote thluh sehla, Nipidaw a hnin phah thluh ding, mak ti tukin Chinmi Ziang an cang, Ziang an duh, Ziang lungawi lonak an nei, Ziang kan tuah sak ding, tin kan duhdan theih tum le tuahsak tumin an buai celcel thluh ding. Ziangahtile, Tlangmi dang Zakhaing le Kachin tipawl hnakin Kawl do lo bik kan si tlunah, Kawl party cahnak bik cu Chinram a si ruangah, an ruah ban loin nasatuk ih thil thlengaw a um ahcun, an hrang le mikip hrangah mangbangza a tling hrimhrim.

Hmanseh, VANDUAI AH, Chin cu kan hriamhrei thazang in zoh tik lawngah in nautat a silo, 2010 le 2015 hrilawk ah Chin mipi 90% in an Kawl party vote kan pek thluh tikah, kan thinlung hrimhrim hin annih Kawl cu kan upat, lei pathian tlukin kan rinsan, kan zoh sang ti kan langter. Ziangtin Zakhaing vek cun in zah, in upat thei ding?

TUI HNU TAL AH; HRIAMHREI cahnak tel lo, Hrem le Thawngtlak khal theih lo, Thisen, Thlan le Mithli luan ṭul lo, zalenzet in nemten hman theimi thazang cak maksak MILIAN le farah ti um lo, Cathiam le thiam lo ti um lo, Bawi le Mirethei ti um lo, rammi zaten zalen zetin hman theih, awmsung ih duh hrilmi langter theinak thazang cak maksak hrilfung “vote, me” hmang in, miphun zah-um le phunsang kan sizia langter thiam thlang uhsi.

Saduhthah in hriamhrei thazang hmang thei ve lo hman sehla, a nemzawng ih hman theih thazang cak le maksak tal kan thiam lo ahcun, a hmin men ih miphun ti tlak fang kan si vivo ding, Uktu lungput nei ban lo phun nauta, hnamdang ih nautat le hrual rero tlak fang kan si lanta ding.

CERLIAN NINU; 1947 ah, Aungsan in meithal zun khat puah loin, a awkam thawn in neh ih Kum 70 leng in uk. 2015 ah, a fanu in meithal zun khat puah loin, a larnak thazang thawn in neh lala ih, uk rero tlak miphun nauta ah in cangter bet. Hmanseh, 2020 cem zawng tal ahcun, meithal zun khat puah ve loin, Ukmi men silo Uktu si tlak miphun kan sizia, pupa san ihsin kan lu tlunah hnamdang toter duh lo, Kawl mimangpawl ih tai lai duh lo hee cin phunsang Chin kan sizia, langter ve uhsi!

Hminsin: Hihi vote hawlnak men a si lo. Phunsang lungput nei Chin miphun sinak a takin langterdan, hnamdamnak le zalennak Ninu hmuh theidan Lamzin a si sawn!

 458 total views,  1 views today

This function has been disabled for Chin 11 News.