Pu Ngun San Aung Biachim Cu Miphun Dawtu A Sinak A Langhter Ah Ka Ruah Ko!

Chin state Chairman thar Pu Ngun San Aung biachimmi nih, amah ram le miphun dawtu a sinak a langhter ah ka ruah ko. Chin state Chairman thar Pu Ngun Sang Aung biachimmi nih, amah Pu Ngun Sang Aung “ram le miphun dawtu” a sinak a langhter kolo hme maw.

Media pawl thawng ttialnak a hmanmi a si ahcun,”Chinram,HaKha le kan miphun” caah rianttuan kha ka timhmi a si, ati tiah an ttial. Cun uknak lei nakin “tthanchonak” lei ka ttuan lai a ti, an ti. Raalkap caah ttuan kaa tim ballo a ti, anti fawn. Cubantuk in bia a chim I a thinlung asi ahcun, ram dawtu pakhat a si pinah politician pakhat a si ve tinak zong a fiang.

Cun, Hakha innhmun kongkau zongah “siaherh” nak a nei tibantuk zong an chim. A ngaingai kan ti ahcun, tutan Ralkap nih nawlngeihnak an lak ahhin, a lawm biktu a si hlei lai maw kan tuak ve a hau, theih bangin election a hmanlo tiah an ti vemi a si, kan thei. Media pawl chimmi a hman ahcun Pu Ngun San Aung nih an ka fialmi ka pom lo ahcun Miphundang an fial hna lai I cu nihcun an kan hruai ka zumh, a ti an ti. Cucaahcun ka pom ko a ti, tibantuk hna in an ttial. Cubantuk a si ahcun a tthat ngai ko ttung. Amah nih pom hlah sehlaw midang nih an pom tthim tthiam ko lai, tuak khawh a si.

Cun, theih awk a simi pa 1 cu, kan dihlakin lungrual khawh a si lo. Party zong pa 1 lawng um ding a silo. Tutan zong ahkhan NLD nih Chinram dihlak MP 18 ummi ah 16 an lak hlah maw, Cucu thil tthabik a si lo. Hla nih a dotu le a hua-tu zong nih an herh ve a ti khah. (Opposition) hi hmun 3 ah hmun 1 tal um ah a ttha tawn. Tahchunhnak ah Chinram Khrihfa sidih usih ti kan duh, kum 100 leng kan liam cang kan si kho rih lo.

Chairman thar Pu Ngun San Aung zong cu kan theilo nain, patling cathiam, mifim nih khua tampi a ruat in a tuak hnu ah a pommi si lai. Kan duhning lawngin um seh tiphun in chim le au hi a ttha bik si lai maw, Chin state Chairman ahcun Chinmi thengte kei nihcun ttha ka ti.(Ttanh neilo, bialai in) Credit: Liante Lai