Pu Ngaisak Nih Chairman Sinak An i Cuh Lio An Buainak Kong a Phuan Cikcek!

Pu Ngaisak nih chairman sinak an i cuh lio an buainak kong a phuanmi
================================
Party pathum an i fonh hlan hruaitu pathum karlak buaibainak kong cu CNLD chairman pathum lak pakhat a si vemi Pu Ngaisak nih tling taktak in August 02, 2017 ah Facebook ah a tial.

“12.7.2017 ah CNDP in Pu Siang Mang le a hawile nih ton kan in duh an ka ti i Moon Bakery ah kan i tong hna. CNC tiah party thar min pek an timhmi hi Hakha le Thantlang peng nih kan duh lo caah nang(CLD) nih na kan bawmh ahcun min a thar kan thlen khawh lai ka zum tiah Pu Siang Mang nih a chim.

“Nain, party dang he i fonh ding ah cun keimah le CEC nih biachah khawh a si lo, party conference auh hmasa a hau tiah ka leh hna. Pu Siang Mang cu keimah nak upa deuh a si fawn caah rawlman zong keimah nih ka liam piak dih hna.

“Party pathum hruaitu i ton ding zong a herh lo ka ti ko nain Pu Siang Mang nih aka forh chih caah dawr pakhat ah kan i tong hna.Kei le Pu Zozam hi kan phak caan ai lo, Pu Siang Mang le Pu No Than Kap hi a hnu deuh ah an phan ve.

“Pu Hlung Ce hi cabuai hriang bik ah a thu caah amah nih biachim hram a thawk, ‘party pathum i fonh khawhnak ding ca ah hruaitu pathum tonnak kan sermi a si, hika kan i ruahmi hi aleng ah kan chuahter lai lo’ tiah a chim.

“CNDP le CPP nan i fonh cang i CNC min nan thim cang caah zei dirhmun tiang dah nan phak cang timi theih ka duh tiah kei nih ka ti ve hna.

“Pu Zozam nih ‘kei hi kan pathum lakah upa bik ka si caah ka chim hmasa ko lai, CLD zong kanmah he rak i fonh ve ulaw kan duh, nan rak i fonh ve ahcun kei le Pu Nothan Kap nih chairman kan tuan lai i nang hi general secretary na tuan ve lai’ tiah a chim.

“A chim cuahmah lio ah Pu Hlung Ce nih ‘a si kho lomi a si, cohlan khawh a si lo’ tiah a leh colh ve. Pu Nothan Kap nih cun a lung um bia a chim lo, theih a duhmi lawng a hal. I fonh ding cu party conference auh theng a hau lo, chairman le CEC nih biachah awk a si ko tiah a chim.

“Kei nih party conference auh hmasa a hau, mi tam deuh duhnak in biachah awk a si tiah ka chim. Cu le cangka in Pu Zozam a thinhung i a chuak colh, hohmanh nih kan thlauh ve lo.

“Pu Hlung Ce cu a thinhung ve i ‘lungfim upa pakhat nih mah pumpak hlawknak ca ah khuakhan ding a si lo, miphun ca ah khuakhan ding a si’ tiah aw thang ngai in Pu Zo Zam cu a zai hnawh ve.

“A donghnak ah cun Pu Nothan Kap zong nih ‘i fonh ding kong ceih ka huam ti lo, ka lungsau kho ti lo’ tiah a chim ve”.

Note: Pu Ngaisak nih a tialmi cu tuni tiang a Facebook timeline ah a um rih ko, tling tein rel khawh a si.

 247 total views,  1 views today

This function has been disabled for Chin 11 News.