Pu Hau Do Suan Lawmhpi Nak Le A Dirhmun Konglam Fiangter Nak

Chin miphun chungin Myanmar Representative to UN ( Kawlram cozah nih UN ah palai a chiahmi ) hmasa bik a simi U Hau Do Suan B.A ( History ), Master of Public Policy ( Singapore ) cu naite ah a pension hnu in NLD cozah nih rian pical tak a simi, Deputy Minister for International Cooporation tuanvo an pek. Pu Hau Do Suan hi Ministry of Foreign Affairs department ah kum tampi rian a tuan hnu ah President Thein Sein nih Embassador to Canada rian a rak pek. NLD cozah kai hnu ah Myanmar Representative to UN ah an chiahmi a si.

2019 lio ah khan, Tedim Myone NLD EC nih State Counsellor Daw Aung San Suu Kyi ( Minister for Foreign Affairs ) sinah ca an rak kuat. U Hau Do Suan hi NLD candidate caah rak kan pe, an ti. State Counsellor nih a lehmi hna cu, a si kho loh. A pension deng cang i, mah a rian in aa dinh khawh in rian pical pek ka duh tiah a rak lehmi hna cu atu a takin a tuah cang.

DASSK Nih 2015 A Saduhthah

2015 Election hlante in kan pi DASSK nih Chin mi chungin Union Minister pakhat khat pek a rak i timhnak kong cu U Win Htein cauk ah hmuh khawh a si. Vice President caah Kachin pa U D. Sin Ram ( Atu i Kachin State, Attorney General a tuan liomi khi ) an rak ti nain election a sungh caah ruahlo pin Pu Henry Van Thio an rak tuantermi a si tiah Myo Yan Naung Thein nih a chim.

Vice President Thutdan He Kan I Hlat Cang Ko Rua :

NLD cozah term khat chungah Union level in Chin miphun nih dirhmun biapi taktak a simi VP kan co. Karen nih Amyothar Hluttaw Speaker, Kachin nih Pyithu Hluttaw Speaker, Rakhaine nih Amyothar Hluttaw Deputy Speaker, Mon nih Union Minister for Ethinc Affairs tiin an co ve hna lio ah, Union level in zeihmanh a co ve lomi tlangcung miphun chungin Shan, Kayah, ti bantuk an rak um ve. Atu Pu Hau Do Suan Deputy Minister rian an pekmi hi cozah thar cu a si rih lo nain, cozah thar caah timhtuahnak lam si dawh a si.

Atu lawlawse ah Minister for International Cooporation hi U Kyaw Tin a si i cozah thar an form tikah cun U Hau Do Suan in an thlen te khawhmi a si. Chim duhmi cu Union level in Chin miphun chungin minung pahnih hi cu a kan pek lai zumh a um lem loh. Tlangcung miphun dang dang kha phawtzamh cio a herh lai caah 2021 – 2025 chung NLD cozah thar ah hin Vice President thutdan cu hmun dang ah aa thial te hmanh maw timi cu Pu Hau Do Suan Union level in rian pical an pekmi nih hin a langhter ko cang rua. Asinain, zumtu hna nih biatak ten thlacam rih ko hna usih. Chinram ah tuah dingmi rian a tam tuk rih caah VP kan co khawh hi a biapi tuk hringhran .

Catialtu: Victor Pa