President Trump Nih Thil Lianngan Tukmi A Tuah Than Hoi Ee! Minung 26 Bak A Ngaihthiam Hna!

Stone, Manfort Le Charles Kushner Telh In Trump Nih A Tharin Minung 26 A Ngaih Thiam Hna:– Caansaupi a dirpitu Roger Stone, a campaign chairman hlun Paul Manafort le White House senior adviser Jared Kushner i hringtu a pa Charles telh in Wednesday ah khan Trump nih a tharin minung 26 ngaihthiamnak a thanh. Trump nih an sual a ngaihthiammi hna hi amah a tanhtu, asiloah a chungkhar he pehtlaihnak a ngeimi pawl lawng an si. A term a dih lei sangah, a aiawhin tazacuainak a kalpitu a minung hna chawhkanh in sual ngaihthiampiaknak cu hnawhnam ngaiin a kalpi i, a hawikawm, rii ngeilo in office i rian a tlaih chungah a zeiti paoh in amah a tanhtu pawl cu sualngaihthiamnak laksawng a chuah ta hna.

Tutan a ngaihthiammi lakah Manafort le Stone hi rengsang taktak an si i, mini an thangchiat ngaimi Trump adviser hlun a si. Hi hna taza a cuaitu hi special counsel Robert Mueller kha a si i, sualpalhnak a tu le tu biaceih a tongmi an si. Manafort hi a inn tangah thong an thlaak i, a fonghnak ah khin a sual ai phuang i, Mueller he rian tuanti dingin lungtlinnak a tuah. Cu hnu zongah cun biaceihbawi pawl a hlen than hna. Stone belte nih cun President humzual duh ruangah Congress pawl a dehhlen ve hna nain, a sualnak ai phuang thai ti lo.

Bank le tax kongah, ramdang he phungbuar in pehtlaihnak a tuah caah, tehte an hmanmi pa thalo in a ziah caah, Manafort hi kum 2 thong a thlak i, Covid-19 ruangah kadang ah an thial than. A sunghkhaan dingin Trump nih Stone a chimh hlan ah khan, Congress nih an auhmi tehte a hrocer ruang i sual an phawtmi cu Trump nih tu kum awtka ah khan a ngaihthiampiak. Tax kongah le, tehte a hrocer caah le campaign phaisa ningcanglo in a hman caah, tiin 2000 tein khan khahlan New Jersey US Attorney Chris Christie nih Charles Kushner hi taza a cuai bal cang.

Tax kongah voi 16 tiang sualpalhnak a ngei, voikhat cu federal lei in tehte a tuanmi a naunu pasal thalo in a hrocer. Voikhat cu Federal Election Commission a hlen fawn hna. โ€œTazacuainak ka kalpimi chung vialte lakah C. Kushner nih a buarmi sualnak hi a zualhmabikmi a si. A maakpa William Schulder lila nih cun 2003 in khan a ralchanh in tehte a tuanโ€ tiin Christie nih 2019 ah khan a chim. William hrocer a duh caah cun, Kushner nih hlawhhlangnu a hlan i, Bridewater, New Jersey ah a ummi motel pakhat chungah cun William cu nuva siti dingin a soilemter. Cu motel ah cun Kushner nih video camera a rak thuh ziar.

Cu video a zeihmi cu a farnu (William nupi) Esther a hei kuat. Asinain, a donghnak ah cun a hlawh a tling hlei lo. An nuva cun cu video cu biaceihbawi sinah an chuahpi i, biaceihbawi pawl nih cun minu cu tlaih dingin an hlathlai colh. Cu in cun hlawhhlangnu zong cu amah Kushner lehlam cu a ngiar ve lawlaw cang. Trump nih khahlan California GOP Rep. Duncan Hunter a sual a ngaihthiam a thaizing bakah Hunter a nupi Margaret zong cu Wednesday cazin chungah a telh colh ve. Campaign fund a pumpaak caah thei na ko bu in le lungthotein a mersan ruangah nikum ah khan Margaret hi sual an phawt mi a si.

Rengsang minung a ngaihthiammi hna pinah a dang minung 20 thiam tutan ah Trump nih a ngaihthiam hna. Cyber kong, meithal kong, mail dehhlennak kongah tlaihmi an si hna. Cu bantuk sualnak a buarmi lakin minung 3 a ngaihthiam hna. Tuesday ah khan ngaihthiam dingin cazin a laakmi hna lakah hin khahlan campaign tuah a bawmtu George Papadopoulos, khahlan US congressman Chris Collins le Iraq i mibu a thattu Blackwater guards lakin minung 4 an i tel i, cu hna cu an dihlakin Wednesday ah an sual ngaihthiampiaknak thawng a thanhpiak hna.

Alex van der Zwaan zong ai tel ve. Anih hi the Dutch sihni a si i, Mueller kong hlathlaitu hna sinah lih a chim caah ni 30 (30 days) lawng thong thlak dingin bia an chiahmi pa a si. 2006 lio ah hriamnaam ai ken lo mi document zong ai ngeih rih lo mi mipeem pakhat an kah hnu ah a sualnak solhnak ai timtu Border Patrol agents 2 zong ngaihthiammi ah an i tel. Cun, a thli in drug a zuar mi hna, kum tampi thongthlak dingin biakhiah a si cangmi hna zong an i tel.

Trump a term a dih cang lai, ti thei in heh tiah West Wing lei ah sualngaihthiamnak hal in phone a chawn na, email a kua hna, tiin an i tuai lulh ko hna. Cuhlan chung kha cu a hawikom, chawva in a bawmtu le Fox News biachimtu pawl ai rinh deuh hna i, sualngaihthiamnak an halmi pawl hi zei ah a relpiak tuk hna lo. Tutan minung 26 chungah hin minung 3 ca lawng hi Justice Department Office of Pardon Attorney sinah nawlnak a tuah bal mi an si. November lio i minung 27 a ngaithiammi hna chungin khan minung 8 ca lawng hi kan tawlrelmi a si, tiin JD office nih CNN ah an chim.

๐Œ๐ฎ๐ž๐ฅ๐ฅ๐ž๐ซ ๐ค๐จ๐ง๐  ๐ก๐ฅ๐š๐ญ๐ก๐ฅ๐š๐ข๐ง๐š๐ค ๐ก๐ž ๐š๐ข ๐ฉ๐ž๐ก๐ญ๐ฅ๐š๐ข๐ฆ๐ข ๐ก๐ง๐š ๐ง๐ ๐š๐ข๐ก๐ญ๐ก๐ข๐š๐ฆ ๐š ๐ฌ๐ข ๐ฆ๐ข ๐š๐ง ๐ญ๐š๐ฆ๐๐ž๐ฎ๐ก:- Amah kong he pehtlaihnak a ngeimi national security kongkau i hlathlainak a tuahtu paoh cu zumh hna lo dingin Trump nih a minung pawl hi thazaang a pek zungzal hna caah, tutan zongah hin an sual a ngaihthiammi hna lakah hin Mueller nih hlathlainak a tuahmi ruang i sualphawt a tongmi hi an tam khun, tiah theih a si.

Manafort le Stone i an palhnak hi amah Trump he ai pehtlaimi a si sual ah cun, Trump nih an sual a ngaihthiam te hna lai, tiin a nehhnungbik i Mueller nih report a tialmi ah khan a langhter bal cang. Stone nih Trump ralchanh in bia a chim duh lo tikah, 2016 lio biaruahnak an ngeihmi ah khan Trump le Stone lih an chim le chim lo Mueller nih biahram a chat kho thai ti lo. Manafort le Stone a ngaihthiam hna nih hin Mueller nih hlathlainak a tuahmi thumhthlaak ai timh pengnak a langhtertu a si. Trump a campaign le Russian nih US election a hnuarsuanmi kongah hi hna 2 hi an lunghrimhbik mi hna cu an si.

Stone bantuk i biatak chim a duh lo mi minung hi cu Congress siseh, JD siseh, phungkalpitu hna siseh, American mipi tiang zong nih dantat an si mi hi an hmuh hrimhrim awk a si. A sual ngaihthiam cu silehlam cang, tiin federal Judge Amy Berman Jackson nih a chim. โ€œBiatak chirhchan in ramdang nih hnahnawh an kan peknak kut chungin kan thimmi hna representative nih kan election humzual dingin a mikip nih an i bochan hna. Hihnu ah zeika zawn in dah hnahnawhpeknak hi ai thok te lai, asiloah mizei lei kap ah dah kan tan deuh awk a si, timi hi ahohmanh nih theih kho rih lo. Cucaah, hi bantuk kongkau i kan lungretheihnak le vansannak kong hi party pakhat cungah ai fut awk a si loโ€ tiin Jackson nih a chim. 2016 lio i Trump campaign ah biapi rian a tuanmi, Manafort i caan saupi a deputy a si mi Rick Gates belte tutan ah ai tel lo.

โ€œPolitics nih mi hi a chiatchuah hna lo. Mi nih politics hi kan chiahchuah,โ€ tiin Jackson nih Manafort le Gates an sualnak kongah a chim. Georgia i a ummi federal thonginn ah thla 40 chung tla dingin an kuat hlandeuh vak ah July ah khan Trump nih Stone a ngaithiamnak ca a kuat bal. Congress a deh hna, tehte a hrocer, Russia kong an hlathlai lio congress committee nih tuahphung an zulh mi a tuaitammi telh chih in, Stone hi 2019 November ah khan sualnak phun 7 in taza an cuaimi pa a si.

Stone hi cu 2019 January ah khan Florida a inn ah FBI nih an vung tlaih. Trump belte hi cu President a si caah a sualnak tehte khaan ter khawh a si lo i, departmental policy ningin hnek khawh zong a si lo, tiin Mueller nih a chim. Manafort hi cu bank le tax kongah 2018 August ah khan an tlaih i, cu hnu cun US ralchanh in buaibainak tuah ai timhmi le dinhnak tuaitam a timh ruangah a sual an chap thanmi pa a si.

Russia ah i dornak a kawltu Ukraine president hlun telhchih in Ukraine politicians tampi he a thleite in an consultant a tuanpiaktu a si. Cu i a phaisa hmuhmi pawl cu humzual a timh caah tax kongah dehhlennak a tuah hi a si. Cun, Moscow i Russian intelligence he pehtlaihnak a ngeimi Konstantin Kilimnik he zong pehtlaihnak a ngeih caah, 2018 June ah khan Manafort cu thong ah an kuat. Kum 7.5 tlak dingin an ti ko nain, Virus ruangah a inn lei ah an kirter ta chung. Thong a tlak hnu tiang zongah JD nih thatein an zoh khenh. Misual hna an bawipa sinah sualngaihthiam khawhnak nawl na pek a si ah cun tutan i president nih a ngaihthiammi bantuk te hi na hmuh ko lai, tiin Weissmann nih Wednesday zaan ah khan Twitter ah a tial.

๐ƒ๐ž๐ฆ๐จ๐œ๐ซ๐š๐ญ๐ฌ ๐ฅ๐ž๐ข ๐ข๐ง ๐ฅ๐ž๐ก๐ง๐š๐ค:- โ€œKa sual na ka ngaihthiam ruangah kai lawm. Ka lunglomhnak hi biaka in ka chim thiam lo,โ€ tiin Manafort nih twitter nih an tial. โ€œPathian ka thangthat. Sual ngaihthiamnak a ka tuahpiakmi ruangah President Trump cungah kai lawm taktakโ€ tiin Stone nih a cun nolh ve. White House le sualngaihthiam a tongmi hna an i lomhnak pin lei ah, Congress i Democrats lei nih ceilak in an vun phomh colh ve hna.

โ€œParty pakhat lawng nih sualngaihthiamnak nawl hi hriamnaam bantuk in ai hman a si ah cun, cucu democracy caah tihnung a si i, dinnak a khing vun thumh bantuk a si. Constitution in sualngaihthiamnak nawl hi hrawh caan a si cang,โ€ tiin Sen. Chris Murphu of Connecticut nih a chim. โ€œTutan sual ngaihthiamnak tuahmi tham hi cu Trump nih zung a chuahtaak lei sang i kan democracy a hrawh tami lak i vurtlang a lusip te a langmi bantuk te lawng khi a si. Kum 4 chung i Trump nih a nawlngeihnak ningcanglo kalpi kho dingin a dirkamhtu Senate Republican vialte hi, hi kongah tuanvo ngei na si viar,โ€ tiin Sen. Ron Wyden of Oregon nih a chim.

GOP lakin mi tamdeuh cu tutan sualngaihthiamnak kongah daitein an um ko rih nain, party chungah buainak a um lo, ti cu a si ruam lo. โ€œTrump a cawlcanghnak hi a chungmuru tiang in a tlol dih cangโ€ tiin GOP Sen. Ben Sasse of Nebraska nih a chim. โ€œTuzan i a cangmi nih hin kan criminal justice system zeiltuk in dah ai rawk cikcek dih cang, timi a langhter. POTUS nih a ka soisel, ka chungkhar a hrocer. Asiko nain, federal/state agencies, Mueller, Congress ka dirpi peng ko rih hna. Asinain, tutan i misual pawl nih ngaihthiamnak an tinco mi hi cu ai palh bakmi thil a siโ€ tiah Michael Cohen nih a chim. Catialtu: Chelsea Bawi