President Trump Nih Biaceihtu Minung 200 Rian Apek Mi Hna Kong Le Black Live Matter Kong Ah Salai Lairamthang Chim Mi

By Salai Lairamthang 

BLM Pawl Nih President Hlun Milem An Hrawh:

Minak pawl a dirkamhmi, Black Lives Matter pawl nih nizan ah Washington D.C khuachungah lam an zawh than I, US president hlun Andrew Jackson milem cu hrawh an timh caah President Donald Trump nih, “Executive Oder” ka chuah lai I, federal monument le statue a hrawkmi poah cu kum 10 tiang thonghlak khawh an si lai tiah ralrinnak a pek hna. White House pawngah an phunmi, President hlun, Andrew Jackson milem cu black lives matter” timi pawl nih nizan ah a cungah an kai hnawh I, hri in dawh le hrawh an timh caah Federal security pawl nih an kham manh hna.

Oregan State, Portland khua zongah President hlun, George Washington milem cu black lives matter minung 40 nih zan sumilam 11:00 hrawng ah an khangh hnu ah hri in an dawh I, an thluk. Maryland State Druid Hill Park i aummi George Washington milem zong si in an kah. England ram London khua zongah England vuancichuk hlun, Winston Churchill milem cu minak dirkamhtu pawl nih naite ah hrawh an zalh ve. Black Lives Matter an hruaitu pakhat a simi, Shaunking nih cun mirang muisam keng , Jesuh lungphun le milem zong kan hrawh dih ding a si ko” tiah a chim.

President Trump nih Conservative Biaceitu 200 Rian A Pek:

2016 US president election campaign lio ah Donald Trump nih president ka tlin ahcun US Supreme court, Federal court le Circuit court ah khrihfa zumhnak a dirpi mi conservative biaceihbawi ka chiah lai tiah biakamnak a rak tuah. A chimning bantuk tein minung 200 nak biaceihbawi Justin Walker cu June 18 ah rian a pek cang. Senate nih vote 51-42 in an fehter. US president thimnak hi president thim tiang lawng zoh ding a si lo, zeibantuk biaceihbawi dah a chiah lai? Pathian a zum maw a chiah hna lai? asiloah Pathian a zum lomi liberal pawl dah a chiah hna lai timi hi tha tein ngiat a hau.

 190 total views,  1 views today

This function has been disabled for Chin 11 News.