President Trump Cu A Lo Cikcek Ko Lai Hi!

Cattial tu: Chelsea Bawi

Financial Records Chuah dingmi Trump nih Kham kho lo dingin Supreme Court nih Bia a Chah

(Trump cu a lo cikcek hoi ko lai hih)

Thursday ah khan Trump i a financial records kong dothlat dingah biaciehtu pawl Supreme Court nih lam a sialpiak hna. Trump caah cun sungh zatlaak a si pinah, president pakhat nih ai ngeihmi a nawl ngeihnak ramri an serpiak bantuk ah a cang fawn.

Capar kan chuahnak rian hi Trump nih kham khawhnak nawl za ah za in an ngeih kho thlu lo. President Richard M. Nixon zong kha Oval Office i biaruahnak an ngeihmi vialte biaceihtu sinah an apter bal. Cun President Bill Clinton zong kha nu tlaihhrem hmuh in taza an cuaimi fehter dingin an rak fial khawh bal.

President a va si pek ah, rammi a si mi paoh cu sualnak an tuah ko, tiin tazacuai an si tikah an sual taktak le taktak lo langhter dingin an lung a tlin hrimhrim a hau. A financial records cu biaceihzung ah chuahpi dingin Trump kan chimh tikah duh lo in an changtur kho mi a si, tiah Chief Justice John G. Roberts Jr. nih a chim.

Nihin tiangah cun Congress pawl zong nih ai khatmi records tam an hmu lem rih lo, tiah biaceihzung nih a chim. Lower courts kut ah an ap te lai i, election ni a phaak hlan chung cu zapi theih in phuan a si rih lai lo, tiin biachahnak an tuah te lai.

Hi cases pahnih kongah chief justice nih zapi an lung a hal hna i, 7-to-2 in vote in hnatlaknak an tuah khawh. Chief justice lei ah liberal lei in minung 4 an tang i, Trump nih a thimmi minung Justices Neil M. Gorsuch le Brett M., Kavanaugh zong amah lei an an i kawp.

Justices Clarence Thomas le Samuel A. Alito Jr. belte nih an duhnak an langhter lo.

Zeitindah Biaceihzung nih bia a Chah

7-to-2 vote in biaceihzung nih biachahnak a tuah i, Congress kut tiang ko rih ah cun Trump nih a financial records hi a kham khawh rih ko nain, NY i upadi lei minung pawl belte nih a records pawl cu an zohpiak thiamthiam te lai.

Cu ti bia a than le cangka Trump nih Twitter in a leh colh ve na. “Hihi politic lei in tazacuainak tuah bantuk a si. Mueller i a Mithla Ramvaihnak rian le a dangdang pawl zong ka tei cang hna. Politics lei ah a thumaan cangmi NY khuapi ah raal ka tuk than a hau ko rih ne hi teh. Hi thil an tuahmi hi President dirhmun, asiloah a cozah caah ai ningcang lo mi thil a si,” tiin Trump nih a chim.

Supreme Court nih biachahnak a tuahmi hi Politic lei Mithla Ramvaih bantuk a si, tii Trump nih a chim. Ka financial records dothlat dingin Supreme Court nih NY um upadi lei minung pawl nawl a pekmi hi zeirello bia a si, tiin a chim. Tutan biachahmi zong hi lower courts ah an kuat than. Cucu kan kelbon kan hlam peng, tinak a si. Kamkhat ah cun kai lawm ko, asinain khatte lei kap ah cun kai nuam ruam lo. Hi bantuk cawlcanghnak hi cuhlan ah ahohmanh nih nan hmuh bal lo mi Mithla Ramvaih rian bantuk a si. Mi zeirelo tuk bia a si. An i tlaihmi politics a si. Federal level in ka tei hna. Cu tikah, kan konglam hi New York lei tu ah an kuatnak hi a si,tiin Trump nih a chim.

President an si ah, an official communications an si pek ah, an sining dothlat hau a si taktak ko ah cun upadi tangah an um awk a si. Cu phung kan kalpinak hi kum 200 a si cang, tiah Chief Justice Roberts nih a chim.

Cozah kan i hruai ning ah, cun kan biaceihzung zong nih a chim pengmi zong a si i, ahohmanh hi upadi (law) cungah an um lo. Cu kan phung cu president cung zongah hman khawh a si, tiin Justice Kavanaugh nih a chim.

Trump a phaisatlaitu le bank lei tuanvo a lakpiaktu sinin an phaisa cazin (financial records) violate cu biaceihzung ah chuahpi dingin Supreme Court nih biachahnak a tuahmi cungah Trump ai nuam lo i kham ai tim peng. Amah Trump nih ai ngeihmi records pawl chuahpi an fial mi a si lo. Trump a cazin tlaitu lei nih cun bia an chahmi kan zulh ko lai, tiin an chim.

Trump hi a president office i a thut chung paoh cu zeibantuk sualpalhnak ruang hmanh ah tazacuai khawh a si lo. Cun Trump i a financial record cekhlatpiak ding taimai in Supreme Court nih nawl a ngeih lo pinah cu bantuk dothlatnak tuah khawhnak phung zong a um fawn lo, tiin Trump lei sihni nih an chim.

Supreme Court nih biachahnak an tuahmi hi chitkhat lawng a daihmi hlawhtlinnak lawnglawng a si. President tax records laa kho lo dingin Supreme Court nih lawlawse cu Congress le NY biaceihbawi pawl a kham khawh rih hna caah kan i lawm ngaingai ko. Lower courts zong ah a hlei in chap a herhmi dun le daan pawl chuahpi khawh kan i zuam rih lai, tiin Trump a sihni Jay Sekulow nih a chim.
NY biaceihzungah taza an cuaimi kham khawhnak thazaang Trump nih ai ngeih khawh nakhnga Supreme Court nih lam a sialpiak ve, tiah Sekulow nih a chimmi hi biahmaan a si. Asinain state level i biaceihtu tuktak nih kan records pawl ceihkhawhnak nawl an ka ngeih lo, tiin Supreme Court sinah president Trump nih a chimmi belte cu biaceihbawi tam u nih cun an cohlaang kho lo. State level i biaceihbawi pawl nih office ah a thu cuahmah ko mi president pakhat a konglam hlathlat an duh a si ah cun cohlan awk a tlakmi thawngpang an chuahpi khawh a hau lai, tiin Justice Department nih an chimmi zong tam u nih cun an cohlang kho lo.

Trump nih phaisa ai chiahnak Mazars USA cu biaceihzung chuak dingin NY i Manhattan district attorney Cyrus R. Vance Jr. (democrat) nih thawng a thanh hna. Kum 8 chung i Trump a pumpaak phaisa records le 2016 election an cuh lio i Trump Organization nih phaisa a tomtom in an hmannak record pawl hi hlathlai an timhmi cu a si.

A tu bantuk i biachahnak an tuahmi hi kan ram justice system caah thil tha ngaingai a si. Mizei hmanh, president a si pek ah, upadi (law) cungah an um lo, ti an langhter. A tu bantuk khat le khat i alhnialnak a tam ruangah tutan biaceihmi suu hi ceih kho lo in kum khat kan liam cang. Tutan i pehzulhnak kan tuah tikah hin kan phung le lam ning tein kan kalpi ko lai, tiin Vance nih a chim.

Trump he kan sex kan hmangti bal, tiin a ti tu a piaka ai zeihmi nu Stormy Daniels sinah Michael D. Cohen nih a pekmi phaisa vialte cu Trump le a company nih an rulh than dih. Keimah zong Trump he kan it ti ve bal, tiin a titu modelnu Karen McDougal phaisa an pek lio zongah Cohen ai tel ve.
A phaisa cazin chuahpi lo dingin Trump nih phaisa kengtu company a chimh hna nain, lower courts lei nih an duh lo. President i a pumpaak phaisa hmannak cazin zohpiaknak dingah NY biaceihbawi pawl nih hin third party minung pawl an i hman a hau te lai, tiin US Court of Appeals for the Second Circuit, NY nih an chim.

Cu ti third part pawl hman cu Supreme Court nih a pompiak cang hna. Aaron Burr’s 1807 lio President Thomas Jefferson taza an cuai rii in khan office ah a thu cuahmahmi president pawl zong tazacuai khawh an si ko, timi tuanbia a um, tiah Chief Justice Roberts nih tuanbia chirhchan in a chim. President Trump hi tazacuai khawh a si, tiin Chief Justice Marshall zong nih a ti ve.

Nixon le Clinton kongkau zongah khan chief justice nih ca a tial, biaceihzung nih Chief Justice Marshall’s biachahnak an i hrawmpi. Cuhlan i tazacuai a tongmi president pawl zong hi federal biaceihzung in taza an cuaimi a si theng lo. Cucaah, tutan i Trump taza a cuaitu pawl zong hi state level minung an si.

Mah bantuk i taza nan ka cuai ah cun ka rian nan ka tlolhter dih lai lo maw. Cun zeiah nan ka rello ah a cang lai. Cu pin ah ram chung i biaceihbawi vialte nih an duh caan paoh ah tazacuai khawhmi ah pei kai can cang lai cu, tiin Trump nih a chim. Cu a chimmi vialte cu Justice Roberts nih a hnonpiak.
Asinain, third party ko ngai i president a financial record ruangah hnahnawh pek taitai cu an duh lai zumh a um lem lo, tiah chief justice nih a chim. Cun, kan president hi zeiah kan rello bia a si hrimhrim lo. A phaisa kongkau ah sualpalhnak dirhmun a phan khomi thawngpang a um caah a si, tiin a chim.

Clinton case lio zongah khan Court nih a duhlonak a langhter bal ko. Cu tikah, state le federal courts pawl an tha a rak chia ngaingai bal. A liamcia kum 200 tein khan president a si pek ah ahohmanh hi tazacuai khawh lomi an um lo, tiin biaceihzung nih phung a ser bal cang. Cu phung cu nihin ah kan tharchuah than ceu khi a si ko i, president i a pumpaak cazin dothlatnak tuah kan duh tikah president zong a luat kho hlei lai lo, tiin Roberts nih a chim.

Trump v. Vance, No. 19-635 tazacuainak kongkau ah chief justice lei ah a tangmi hna cu Justices Ruth Bader Ginsburg, Stephen G. Breyer, Sonia Sotomayor le Elena Kagan joined the chief justice’s majority an si hna. Justice Kavanaugh le Justice Gorsuch zong nih mitam u duhnak an zulh ve ko nain, an zulhnak a ruang belte an chim duh lo. President zong hi tazacuai in a luat kho hlei lo, cucaah, taza an cuai khawhnak dingah ning le cang tein lower courts nih a biaceihbawi pawl rian a fial khawh hna a hau lai, tiah Jistice Kavanaugh nih a chim.

President zong tazacuai a luat hlei lo. Cucaah, tazacuai khawh lo dingin lamsial a si te lai caah, cucu i ralrin nan hau lai, tiin Justice Thomas nih lower courts pawl lungfim a chimh hna.
President nih ai ngeihmi caan le a rian pawl hi an biapituk lawmmaam caah, cun president office hi zung tenau sinah ap phung zong a si lo. Cucaah, tutan tazacuainak ah hin amah President hi cu pumpaak in zungah a rak chuak lai lo nain, a caan hnahnawhpek a si pin ah a khing kan rihter ngaingai te lai. Cucaah, cutluk i ai manh lo mi, a khing a ritmi kan president a dirhmun le sining theihthiampiak bu tein baiceihzung pawl nih a cazin hi nan zohfelpiak a hau te lai, tiin bia a cah hna.

Trump nih ai bochan cemmi a taangphaw cu the majority nih an chuh. Asinain, mi sawhsawh nih an i ngeihmi mah le mah an i kilvennak chance he ai khatimi lawng hi maw kan President hi pe ve sual lai u ci. Biaceihzung nih bia a chah te lai ding tu hi i hmaithlaak ko hna u sih, tiin Justice Alito nih a chim.

Ziknawh phaisa a hmanmi kongah siseh, a sunghmi le a miakmi kong a chimmi ah siseh, president pakhat dirhmun in le, a company le a chungkhar he pehtlaiin a phaisa cazin henghung vialte kongah a phaisa cazin tlaitu le a phaisa chiahnak hmun – Deutsche Bank le Capital One sinin Congress pawl nih cazin an hal hna.

Biacheihzung biachahnak hi kan zulh ko lai, tiin Deutsche Bank aiawhbiachimtu Daniel Hunter nih a chim. Kan Bank nih hin US legal phung vialte hi kan upat peng i, biachahnak a tuahmi paoh cu kan hnatlakpi peng ko. Cucaah, biaceihzung nih biachahnak an tuahmi hi kan zulh ko lai, tiin achim.

Mazars USA zong nih cu bangin a chim ve.
Trump v. Mazars USA, No. 19-715 tazacuainak ningah, biahalnak a thar in an tuahmi kong Justice Roberts nih a chim. Congress le president karlak biaruahtinak kha cu phungning zulh in a si theng lo i, zapi hmuhning zulh deuh in donghnak tuah a si. President tazacuainak dingah Congress a dawn khan khotu nawlngeihnak zeihmanh a um lo.
Kan president kongkau i sianginn nih siseh, achieve nih siseh, internet service lei nih siseh, email riantlaitu nih siseh, phaisalei riantuantu pawl siseh an langhtermi viatle hi Congress nih a caan a rem a ti tikah a langhter vir te lai. Cucu kan House nih ai ngeihmi a phung a si, tiin Roberts nih a chim. Minung pumpaak nih ai ngeihmi official he ai pehtlai lo mi thil kongkau hlathlainak nawl Congress nih ai ngeih lo, tiin Justice Thomas nih a chim. Taza an cuaimi zoh chun in House lawnglawng nih cu pawl cu a hlathlai khawh lai, tiin a chim.

Trump a thawngpang hlathlainak rian hi zeitin dah committee he pehtlaihnak a ngeih khawh ning a si, timi committee lei nih nan kan hrilhfiah a hau te lai. President taza nan cuainak a ruang pahnih hi Supreme Court a nawlngeihnak pinlei ah a ummi an si. Tuan i Supreme Court nih a ceihmi pawl zongah khan cuhlan president pawl zong nih an information telhte langhter an duh lo i, partisan hmangin biachahnak an rak tuah bal theng ko, tiin Justice Alito nih a chim.

President Nixon le Cliton lio ah khan, anmah nih rian an khinhmi biaceihbawi pawl lila nih pei an ralchanh hna i amah ralchanh in biaceihzung zong nih biachahnak a rak tuah ko cu. Nixon cu tazacuai dingin mipi an au tuk cang caah, a celh ti lo i ra rian in an phuak phah. Cliton lio ah khan taza an cuai i Senate kut in cun a luat ko nain, rian in ai din thiamthiam ko.

Tutan zongah hin Trump nih rian a pekmi Justices Gorsuch le Kavanaugh zong nih amah Trump lila cu an ralchanh ve i, chief justice le a dang 4 lei tu ah an tangh.

 163 total views,  1 views today

This function has been disabled for Chin 11 News.