President Trump A Naupa Robert Trump A Nunnak A Liam, President Trump Fak Piin A Ngaihchia

Zeibantuk zawtnak dah a si ti langhter loin siizung ah an admit mi President Trump i a naupa Robert Trump cu nizan ah khan a nunnak a liam tiah President Trump nih thawngthanh nak a tuah mi in thawngtheih a si. Robert Trump a thih nak kong he pehtlai in President Trump nih a chim mi cu “ka dawt mi ka nau hniang cu tuzan ah daitein ai din cang, ka nau hi unau kan si lawnghmanh si loin hawikom tha taktak bantuk zong in ka zoh mi a si.

Ka nau hi ka ngaituk lengmang ko lai, asinain ruahchan nak ka ngeih mi cu keimah zong ka nau sinah ka kal ve te lai i cu ka hmun ah cun hmunkhat teah ton than nak zong kan ngei lai ti hi a si. Ka lungthin chung ah na caam peng ko lai ka dawt mi ka nau Robert Trump. Dai tein i din ko kun ne mu” tiin President Trump nih cun White House nih cathluan an chuah mi ah a tial hi a si.

Cacawn ninga ni ah kha President Trump nih a naupa Robert Trump hi New York siizung pakhat ah a va zoh i minutes 45 tluk a umpi, cu cu a donghnak bik an i hmuh zong a si i zei bantuk zawtnak ruang ahdah Robert Trump hi a thih ti cu langhter a si lo.

Kum 71 a si mi Robert Trump hi a upa President Trump cung ah an hngakchiat lio tein zumawktlak tein a nung zungzal mi a si i kan hnu ah President Trump soisel nak le thangchiat nak cauk “Too Much and Never Enough: How My Family Created the World’s Most Dangerous Man” ti mi an chuah zong ah khan hi cauk chuahtu pawl hi tazacuai tu hna a si nain hlawhtlin nak a rak hmu lo.

President Trump nih a chim rih mi cu “ka nau hniang Robert Trump hi mi tampi nih theih le hngalh mi cu a si lo nain kan chungkhar ah a biapi bik mi pa a si, ka cung ah dawtnak taktak a ngei i zumh awk tlak le bochan awktlak pasal tha a si” tiah a chim.

Source: Akon Thi

 219 total views,  1 views today

This function has been disabled for Chin 11 News.