Philh Awk A Tha Tilo Dingmi Hmape

21st September 2021 ah, Ralhrang nih Thantlang an rak khangh lio video i “Philh Khawh lo ding mi Ni” tiah Facebook ah ka thlah cia mi a hung lang than. Aho phaltu ngei in lo a kangh cuahmah lio Video cu ka van zoh nolh than i zingkhuan in mitthli a tla.

Hi ni ah Thantlang um kan khuapa he kan rak i chawn. Kan i chawnh cuahmah lio ah Sianginn sang inn kaang phalh ah a rannak in rak ra ulaw, an ti i ka kal hau a ti. An hung kal tlawmpal ah Pastor Biak Kolh muisam a leng ti lo. Meithal a puak tuk i an kah hlah maw, tiah kan ruat a ti. A rau loh! Media nih an thanh colh. An thah lawng hmanh si lo, a kutdong tiang cik in a zungbunh an lakpiak chinchap rih. A ruak te hmanh diriam in zunmuai manh lo le tah manh lo in fim zokzok a si. Mitthli he i ciah lio ah a rianrannak in mah le siaremnak hmun cio ah nun him kawl in kan kal i nihin 18 September 2022 cu Thantlang khuapi kan chuahtak ni kum khat tlin ni a hung si cang.

Thantlang hi ralhrang nih an khangh hlan ah cun, inn 1,800 -2,000 fai umnak a si. Chungkhar in chim ahcun, 2,200 lengkai nih toh pin ah, pengtlang kulh khuate 50 fai nih toh le tlat mi a si. Minung in 10,000 leng nih an um hnawh mi a si i khua nuam pakhat a si. Cu vialte minung cu ralhrang ruangah hmun kip le ka kip ah vai rolhkhang a si i kan innpa a si mi Mizoram khuate 44 chung ah kan um hna. Kanmah ram chung khua chinchang khuate 94 ah kan i dor ve. Ralhrang nih uknak a lak hnu in voi 36 khengte a khangh i a inn in 1,340 a si cang.

Ralzam hnu in minung nunnak liam mi hi 75 an si cang, tiah Thantlang Tufa nih an thanh. Nihin ah cun kan Sui Thantlang khuapi cu hling le so in a khat i thingram bua nih a khuh dih ningtih hruai a king mi ram phong ah a cang cang. Nehbung khirh hmanh va um sehlaw, hlan Thantlang muisam a keng ti hnga maw, ti awk in a um. Minung khuasaknak lo bang, vutcaam le meihol i can viar ko dahngai, ruah ah lungfah lo awk tha hlah!

Cucaah atu lio i kan herh mi cu Forhfialnak a si. Kai lunghmuih tuk mi pakhat cu, Thantlang khua inn kaang ah aa tel mi tampi nih, nan ngaihchiatnak le lungfahnak nakin tha peknak le forhfialnak bia an chim deuh mi hi a si. Thih nun ruat lo in ram ca ah hriam a tlai hmanh an um. Kan inn le lo tham cu sakremh than khawh pei a si cu, tiah an bialehnak ka theih tikah, anmah sin lila in thazang ka la. Hi tluk hin maw tutan dohthlennak ah kan lung aa rual ka ti i ka thazaang tlung ngaite. Nihin vawlei ah tihnung bik zawtnak hi Coronavirus (COVID-19) a si lo.

Cancer zawtnak zong a si lo. Khat le khat thazaang peknak le bawmhchanhnak chambaunak a si. Ruahchannak reu kan ti mi zong hi, forhfialnak le thazaang peknak a tong lo mi nun ah a si tawn. Cucaah Encouragement Foundation nih 12 September 2007 ah khan “National Day of Encouragement’ an rak dirh. Hi an dirhnak aruang tampi lak ah pakhat cu, “University kai mino tete hna nih khat le khat thazaang peknak le forhfialnak chambau zawtnak hi kan ram le vawlei fak tuk in a ton mi harnak nganpi a si, tiah an ruah caah a si.

Cu tikah US ram pumpi mitthli le hnapduk he an i ciah ni 11th September 2001 (World Trade Centre cimh Ni) philh lonak ni an hman thaizing ah tuah a si tawn. Aruang cu hi caan ah ngaihchiat mitthla tlak a tong mi, puicimh zawttlak a tong mi hna forhfialnak le thazaang peknak in khat le khat hawikomhnak an ngei. Encouragement Foundation thil tuah mi cu thil tha ah ruah cio a hung si i nihin ah cun hmun tampi ah pehzulh in tuah a si cang. Cucaah tutan kan dohthlennak ah siseh, nihin Thantlang chuahtak kum khat tlin ni ah hin, “Forhfialnak le thazaang peknak” tampi kan herh. Zeicahtiah, thazaang peknak le forhfialnak nih:-

✅Kan hmuitinh phak nakding chunmang a kan ngeihter: Micheu nih thazaang umnak “Datsa” (Oral Rehydration Solution-ORS) he an tahchunh. Chungtlik siloah senteen (dysentery) nih a kan tlunh lio thadih caan i Datsa (ORS) kan van din i thazaang tlun bantuk a si an ti. Kan ton mi harnak le lungretheihnak vialte, kan hawile sin in kan theih mi thazaang peknak bia nih a choih dih. Muihnak horkuang chung ah ceunak a kan petu meifar bantuk a si.

-Ruahchannak a kan ngeihter
-Ruahnak thar a kan pek
-Pahrang kan ngeih mi, thil ti khawhnak le thiamnak kan ngeih mi siseh, zumhnak kan ngeih mi a kan tharchuahter
-Teirialnak, teimaaknak a kan ngeihter
-Kanmah le kanmah i zumhnak le nun-man i upatnak a kan ngeihter Credit- Salai C. Twintwin

Be the first to comment

Leave a Reply

Your email address will not be published.


*