Pha-Kanh Thihnak Kong He Pehtlai In Ralkap Bawi Le Vuanci Dantat Hna Ding Bia An Chah

Pha-kanh lei minh nak kogn he pehtlai in humhim nak lei tuanvo pek mi hna ralkap bawi cheukhat le Kachin ramchung humhim nak le ramri kong ah vuanci a si mi pakhat cu dantat nak kan ngeih hna lai tiah Myanmar Tatmadaw nih thawngzamh ah an rak tial.

Pha-kanh ah lei minh nak a chuah kha July 2 ah a si ko nain humhim nak lei tuanvo a ngeitu pawl hna ralkap lutlai nih harsat nak le thihnak a tong mi hna bawmhchanh ding in cawlcang an i thok kha July 3 lawng ah si caah an tuanvo ah lungtak nak le bochan tlak in an um lo tiah an langhter.

Dantat nak ngeih ding mi hna ralkap bawi le Kachin vuanci pawl caah midang rian khenh than hna ding a si lai i zumh awk le bochan awk a tlak lo mi ralkap bawi le vuanci cu an rian in dinh ter khawh nak nawl zong kan ngei tiah Tatmadaw nih thawngzamh ah cun an langhter.

Minung nunnak tiang tihnung a si nak hmun le kokek rawhrel nak nih a phak lai tiah hngalh a si nak hmun ah mipi sin thawngthanh nak le kal lo ding in chim phuan nak an ngeih lo pinah mi tamtuk nunnak a liam ko mi ah dai tein an um i a thaizing lawng ah cawlcang an i thok mi ruang ah tuanvo ngeitu lutlai a si mi hna ralkap bawi le vuanci pawl an rian in dinhter an si lai tiah Tatmadaw nih cun thawngthanh nak an tuah hi a si.

July 2 ah Pha-Kanh vawlei cimh hnawh nak ruang i a thi mi hna ruak an hmuh mi hi ruak 172 an si i minung 54 cu hliamhma le a nung in an chanh chuah hna, cun a tlau mi zong tamngai an um rih tiah an langhter.

 281 total views,  1 views today

This function has been disabled for Chin 11 News.