Pha-Kanh Ah A Thi Mi A Fapa Ruak An Hmuh Khawh Lo Caah Hringtu A Pa Nih A Thlarau A Kawh Auh

Hringtu a pa nih lunghno ngai in a fapa dawt ruak an hmuh khawh lo caah mithli he “kafa khoi ahdah na um, na thlau kana uh, inn ah kan ttin cang lai” tiah a rak kawh auh mi nih mipi mithli thla in a chiah hna. Chungkhar cawmtu le bochan mi fapa dawt cu zaangfah nak a ngei lo mi thihnak in a rak phak caah a ruak hmanh hmuh khawh a si rih lo.

Hi hringtu pa hi Kalay myohne in a rak ra mi a si tiah an langhter, a fapa hi a hawile minung pali he sianginn kai nak ah tiin lunghring kawl ding in an kal nak ah vanchiat nak nih a phak mi hna chung ah ai tal ve mi a si I an pali ning in an ruak hi hmuh an si rih lo.

Hringtu a pa cu lunghno ngai in thing hnah a hring mi te iput in a fapa dawt thlarau cu a auh lengmang ko. Kafa inn ah kan ttin cang lai, khoi ah nan um kan hmu kho lo, na thlarau kan rak au cu kafa tiah a tap lengmang ko e. Hi hmanthlak nih mi tampi an ngeih a chiat ter hna. Zaangfah nak a ngei lo mi thihnak, duhdawt mi he sianlo buin a then tu thihnak. Thennak vawlei, nun pawcawm nak ah a fapa ruak te hmanh a hmu kho ti lo.

Lungthin a fak I ngaih a chia hrim ko mu. Zeitik tiang ah a fapa zunngaih in a hei hram rih lai. Ruak hmuh khawh lo mi hna zeizat liangluang dah an hei um rih hnga.

 216 total views,  1 views today

This function has been disabled for Chin 11 News.