Pathum Chung Ah Hodah Winner Si Te Lai

Hodah winner ding ah na zumh bik? Myanmar Idol Season 4 hlasak zuamnak ah minung thong tampi Kawlram chung in an i zuam i a tu cu minung pathum Grand final an tang cang.

Grand final pathum chung ah Benjamin Sum, Esther Dawt Chin Sung le Aye Myat Phyu an si i Chinmi pahnih an i tel. An thiam dih caah hodah winner a si lai timi hi ruahchung awk a har bak.

Kawlram mipi nih an uar bakmi hna minung pathum an tang bak ko hih. Hmaizarh nilini zan ah an i zuam than lai i hodah a tla te lai timi cu a tu tein thintur a si ko cang. Kawl pakhat te lawng a tang cang caah Kawl pawl zong nih Aye Myat Phyu ah an vote an burh dih cang lai.

Esther hi hlasak ah palh a hmang pah. Voihnih ai palh cang. Bottom 3 ah voithum a thu cang. Mi dang aw i lak loin a mak kokek awcawi te bak in hla a sami a si. A dang pahnih hna nak in a aw a chia deuh ko nain performance a thiam tuk. Stag cung hlasak ah cawlcangh le umtuzia a thiam kho tuk. Esther a um lo ahcun Myanmar Idol hi a nuam lai lo ti tluk in an ruah cio.

Myanmar hlasak thiam minthang pawl nihcun a aw zong a tha i performance a thiam bak an ti. Zoh a dawh tuk tiah an ti cio. An tlaihchan ngaingai i an uar ngaingai.

Benjamin Sum hi a aw cu international level bak a si an ti. A aw a that bak. A aw hi a duh ning poh in a chuah khawh. Sinain performance a thiam lem lo. Hla  a sak tikah a cawlcangh ning ai rem lem lo. A aw a that tuk caah hin winner a si kho tiah an zumh. Bottom 3 ah voikhat a thu cang.

Aye Myat Phyu hi hla aw cu a tha lawlaw khi a si. Zei hla a sak poh ah a thiam dih mi a si. Performance cu cutluk pi cun a thiam lem lo. An mah Kawl a si caah winner an pek te ko lai tiah Laimi tampi nih kan zumh. Kawlram mi tampi nih an uar mi a si. Bottom 3 ah voihnih a thu cang.

Mahhi hna pathum ahhin hodah winner a si lai tiah na zumh. Rak ruahdamh khawh chung cio a si. Kei cu mah hna pathum ahhin Benjamin Sum nih winner a ngah te ko lai tihi ka zumh mi a si.

 

 326 total views,  1 views today

This function has been disabled for Chin 11 News.