Paletwa Kongkau Hi Securitazation A Hau Cang

CBCUSA General Secretary Rev. Dr. Thlaawr Bawihrin nih, “Paletwa ram bawmhnak caah CBC-USA Khrihfabu 112 cu ca ka kuat dih hna, a tlawmbik inn dongkhat nih facang tunkhat nan thawh dih lai, tiah ka nawl hna” tiah ati.

Ka lung a tling ngaingai.

Ka umnak ram Chin Christian Association of Denmark sinah “Paletwa kan unau hna sinah kutsamh ve hi lakhruak in ceih awk a ttha lai dakaw?” tiah kan hnuah ka rak ti ve len.

“Paletwa peng ah milu 150,000 an um. Milu 60,000 nih harnak an tong, khua 20 a rawk, sianginn 212 an khar, saya 200 an um ti lo, Paletwa ram cu AA ruangah a rawk ko cang, a rannak in bawmh an hau” tiah CBC-USA GS nih a chim.

Nizan ah Khumi (KACC) nih “Paletwa ah minung 12 cu kuan-hma in an thi, fak ngaiin mi 12 nih hliamhma an pu” tiah cathanh a chuah.

Thin a hung, ngaih zong a chia i, lung zong khi a fak.

Kan miphun unau hna nih harnak fak ngaiin an tawn hi cu phun dang a hei si rih. Paletwa kan ram le vawlei te hi miphun dang kut tangah kan sung taktak sual ko lai ti hi phan a hun um ngaingai ko cang. Miphun mitin kan zoh set ahcun “state of emergency” dirhmun ah kan lut ko cang in a hun lang.

U.S President Ronald Reagan nih, “a nation that cannot control its borders is not a nation” tiah a rak ti.

Pathian nih miphun pakhat ah a kan ser ve i, umnak ram le vawlei te a kan pek ve. Cu kan ramri le kan vawlei te zong a humhak kho lomi miphun hna kan si sual ko lai ti hi phan a um ngaingai tawn.

Mirang nih a kan pen lioah Paletwa peng cu Arakan Hill Tracts ah an rak chiah. Nain, Frontier Areas Committee of Enquiry (FACE) hmaiah Paletwa peng kan unau hna nih “kan nih cu Haka sinah ifonh kan duh ko. Haka lei an umnak poah zulh kan duh ko hna” an rak ti caah luatnak hmuh hnuin Laimi kan sin te-ah an hung um. Cu bantuk kan unau hna nih vansanglam in an um lio caanah kan zoh sawhsawh ko hna lai maw tihi ruah-awk a tam ngai ko in a lang.

Hi a tanglei ka thilmi te hi kan hnuah Professor Bjørn Møller (Political Scientist) nih lecture a kan pekmi chungah “security concept” a tar chihmi te a si.

Tulio ah vawleipi ah “securitazation” timi biafang hi a lar ngaingai. Thil pakhatkhat kong kha Acozah maw, buu nih maw miphun nih maw, “security” thilah a chiah le a canter (transforming subject into matters of security) mi kha “securitazation” an hun ti. Biana ah, tuchun ah ramkip Acozah tampi nih “ralzaam le mipeem” kong cu “humanitarian” mitin an zoh kho ti lo, “security” mitin an zoh deuh cang. Cucu “securitazation” an hun ti.

Cutin “security matter” ah chiah le canter ding cu an ram le an miphun caah tihnung thil (threat) asi maw silo ti kha kil tampi (national security, human security, societal security) mitin an zoh hmasa tawn. Research hna tampi an tuahta tawn. Cu hnuah chiahtlak asi ahcun “securitization” an tuah.

Tuchun ah Paletwa peng i a cangmi hi atlangpi in a tanglei bang “security concept” in cuanh khawh asi ve men lai.

◘ National Security (label), Chin state (referent object), territorial integrity (value at risk), Arakan and AA (source of threat) military attack (form of threat).

◘ Societal Security (label), Chin society in Paletwa (referent object), identity (value at risk), Arakan culture and population growth (source of threat), occupation and subjugation (form of threat)

◘ Human Security (label), Chin individuals in Paletwa (referent object), survival and quality of life (value at risk), AA and Tatmadaw (source of threat), rights violations and war crimes (form of threat)

Kan zoh ahcun: kan Chin miphun le kan ram caah tih a nung ngaimi (source of threats le value of risks) a tam ngaingai i a pathum chungah an um dih. A ingtu le a tuartu (referent object) cu Chin miphun le Paletwa peng kan Chin unau kha kan si.

Cucaah tuchun ah Paletwa pengah thil a cang cuahmi hi kil tampi in zoh tikah kan miphun unau hna hi thisa tlai unau kan sinak (brotherhood) mit lawng in zoh hi cu a za deuh ti rua lai lo. Cun minunghoi zawnruah bawmhnak (humanitarian) mit lawng zongin a za fon ti rua lai lo. Chinram le vawlei humhaknak le Chin miphun himnak (national security, societal security, human security) mithman hrimhrim in zuanhnawh le bawmh hi an hau ngaingai ko cang in a lang.

Phundang cun: Paletwa peng kongkau hi Chin miphun nih “securitazation” a hau ngaingai ko cang. (transforming Paletwa issue into matter of security).

Ramkhelrian ah “High Politics” le “Low Politics” tiah an um. Low Politics cu: sipuazi le pawcawmnak (economics) le zatlangnun le nunphung (social affairs) lei kha a huap tawn. High Politics nih cun: miphun nunnak le himnak (survival of state and security) lei kha a huap tawn i a sangbik le a biapibik asi. Paletwa peng kongkau hi Chin miphun nih “Low Politics” lawng za tiloin a sangbikmi le a biapibikmi “High Politics” dirhmun in kan khel caan hi a cuu tuk cang ka hun tinak asi.

Salai Van Lian Thang

 173 total views,  1 views today

This function has been disabled for Chin 11 News.