Paletwa Ah Facang Tun Khat Ah Tingkhat In Cawk Ding A Um Ti Lo

Tatmadaw le AA kahdoh nak ruangah faktuk in khualtlawn lam an phihkhar dih mi le ei-din ding facang a phurtu mawtaw vialte kal kho loin an um dih cang ruang ah kan Chin miphun hawi a si mi Paletwa myoh chung a um mi hna cu facang tunkhat ah Ks ting 1 in cawk ding hmanh an I hmuh kho ti lo tiah Paletwa myoh chung a um mi hna sinin thawngtheih a si.

Paletwa myoh chung a um mi pakhat nih a chim ning ah cun “tatmadaw le AA kahdoh nak ruang ah Kyawh Taw le Paletwa karlak mawtaw lam le tilawng lam vialte phihkhar dih an si. Sami lei zong in ei-din a rak phur mi mawtaw hna cu hriamtlai phu hna nih mei in an khangh dih hna caah cu hnu cun zeibantuk mawtaw hmanh an rak lut ngam ti lo. Cu ruang ah a tu ah cun Paletwa myoh chung ah facang tunkhat ah Ks ting 1 in cawk ding hmanh kan hmu kho ti lo” tiah a chim hi a si.

Cun Paletwa ah civui a rak zawh mi pakhat nih a chim mi ning ah cun “kan nih cu kan khua in a chuak mi facang kan khon mi chung in tunkhat ah Ks tong 70, 80 in kan cawk hna I kan ei lio a si. A tubantuk in zarhkhat zarhhnih chung pehtlai tein an kan phihkhar rih ko a si ah cun ei ding zeihmanh kan ngei ve ti lai lo” tiah zong a chim ve.

Paletwa myoh chung ah facang cawk ding a um ti lo caah innkhat le innkhat cu facang an I cawih hna caah ei ding a hun um ti lo cu hnu cun pakhat le pakhat chawnh biak le pehtlaih nak zong hi a chiakha chin lengmang cang tiah zong Paletwa myoh chung um mi nih an chim.

Paletwa pengkulh chung ah a um mi cu pehtlaih nak lam vialte phihkhar piak dih an si ruang ah zeihmanh lungduh in ei-din ding an I hmuh khawh ti lo caah lungrethei in an um ko hna.

Source: The Chin Journal

 179 total views,  1 views today

This function has been disabled for Chin 11 News.