Palek Sual Taktak Mi, Fak Taktak In An Thah Ve Cang

Naupawi lio a simi Daw Tin Maw Lin tuksapur in a hrem i a thattu lak ah aa tel vve mi, Ma Oo Pin Police pakhat pa cu Namte in an sam caah hliamhma fak tuar in atu hi Sizung ah Emergency in SAC ralhrang nih an kal pi tiah Ayeyarwaddy Times sin in theih asi.

Nihin January 21, 2022 zinglei deuh ah khan misual SAC ralhrang kut taang Police pakhat cu Namte in an sam caah Emergency in Ma Oo Pyin Sizung ah an kal pi hi asi. Namte in sam a tong mi Police pa hi a min ah Maung Maung tiah auh mi asi, Zuri pa pakhat ka tlaih a ti nak ah Zuri pa nih Namte in a sam ruang ah faak ngai in Police pa cu hliam a tuar hi asi tiah an chim.

Atu Namte samnak in hliam a tuar mi Police Maung Maung hi Naupawi lio mi Daw Tin Maw Lin tuksapur in a hremtu le a that tu lak ah aa tel ve mi asi tiah Ayeyarwaddy Times nih cun a langhter.

“Ko Aung Lay timi pa hi Zu a ri i lampi ah a au khuang, cu lio ahcun Civil thuam in Police pawl nih an rak zuan hnawh i tlaih an tim. Cu lio ahcun Namte in a sawm hna. Cun Police nih Meithal in a takpum ah an kah ve nain a mah nih Police pakhat, Maung Maung cu faak ngai in a hliam hmanh ve. Atu hi Ko Aung le siseh, Police pa Maung Maung siseh, an pahnih in Emergency in Sizung ah kal pi an si” tiah theih asi.


SAC ralhrang Tatmah (101) taang ah a um mi Yezakyo Township, Phulone Khuate pawng ah umhmun a khuar mi Tatzin 256 chung SAC ralhrang minung pahnih hna cu an hriamnam he CDM an tuah, an umnak Sakhan an zaam tak i PDF sin ah an kal tiah theih asi.

An mah SAC ralhrang Sakhan zaam tak in PDF sin ah CDM a tuah mi pahnih hna i Zaw Ka Lay Bo Htu le Ko Thet an si, SAC ralhrang tang cawlcangh kan duh ti lo, kan celh ti lo tiah caantha a um lio te ah PDF sin ah an zaam hi a si i Yezakyo Township PDF nih a himnak hmun ah tha tein an chiah cang hna tiah PDF cathanh ah an langhter.

“SAC ralhrang taang ah rian ttuan a duh ti lomi, Mipi lei ah ka dir cang lai tiah biakamnak a tuah mi ralkap pahnih hna cu tha tein a himnak ah kan chiah cang hna. Hmailei zong ah SAC ralhrang chung in mipi lei ah dir a duh mi, CDM tuah a duh mi paoh cu nan chungkhar le nan pumpak himnak tuanvo kan i lak hna lai, a himnak ah tha tein kan i chiah hna lai, a duh mi paoh nih pehtlaih khawh kan si tiah” Yezakyo Township PDF nih cathanh zong ah an langhter chih.

 

Be the first to comment

Leave a Reply

Your email address will not be published.


*