Obama Nih Trump Cu Thil Tihnung Tuk A Roh Taa, Nain Trump Nih Fawi Tuk In A Thianh Dih!

Bidden Foreign Policy le Ralhrang hi zeidah a lawh te hnga? Arab Ram ah US Politics Timeline umtuning ka von taar. Bill Clinton (1993-2001) chan lio i Homeland Security thlahdorh deuh ruang ah aL-Queda ralhrang nih US ah kua an ser i, Bush nih Presidency a von lak, 9/11 ah World Trades Centers pi cu ciam dihlak in an kah. Bush nih al-Queda ralhrang an ithupnak kua, Taliban Cozah, Afghanistan cu a tuk colh. A pa chan lio ah Kuwait in an rak tthalmi, Saddam Hussein cu, Weapons of Mass Destruction (WMD) a ngei tiah a von phawmh chih colh. Saddam Hussein le a ralkap cu Bush nih nihnih/two days ah a tei hna.

Bush nih Iraq ram Democracy cu Paul Bremer hmang in a von dirh colh. Coalition Provisional Authority (CPA) tiah caan karlak cozhah an ser i, tleicia Mohammad Bahr al-Ulloum cu acting President ah an thim. Hi lio caan ah Preisdent Bush nih order chuah aa palh tiah an timi pakhat cu;- Saddam Hussein nih a ralkap vialte hi anmah le sining/rank tein Iraq ralkap an peh lai maw? Asilo ah puah viar dah an ttha lai? timi Agenda cung ah President Bush nih Saddam Hussein chan lio ah ralkap le Cozah riantuantu vialte cu Cozah thar(CPA) ah an rian peh ti lo dingin “Order” a chuah. “Order chuahmi aa palh ruang ah a thar in Iraq ram doh aa thawk tthan” tiah tampi nih an mawchiat.

President Bush nih order a chuah bak in Saddam Hussein ralkap pawl nih an meithal thuhmi an kawl tthan i, a thar in US ralkap cu an doh hna i, a term a dih tiang Iraq ral cu a doh. Bush Presidency (2001 – 2009) cu a von dih i, 2009 in President Obama nih uknak cu a von lak. President Obama nih uknak a von lak in Arab Spring a von chuak. Tunisia ram in a von ithawk i, Oman, Yemen, Egypt, Morocco, Libya le Syria tiah mizapi sandahpiah in an cozah dohnak mei a alh cio. President Obama nih zeitindah Arab Spring hi tlang a tlak lai tiah Vawleipi nih an zoh. Arab ram ah Democracy ni ceu a tlang ve cang lai tiah tampi nih ruahchanhnak an ngei.

President Obama nih a Foreign Policy ah lutlai ah a thimmi, Secretary of State Hillary Clinton nih term khat a tuan in a dinhtak i, Obama Foreign Policy tang ah a riantuannak kong, “Hard Choices” timi cauk a ttial i, cu ahcun Obama Foreign Policy cu a “failed/sung” tiah a phawmh. Syria ah a sung, Libia ah a sung rih. Iraq ah a sung. Iraq ram buainak cu Bush tuahserhnak a si tbk in pehzulh dingmi a daithlang. Cu kar ahcun Iran nih hmunhma an von lak viar. Iraq ram milu tam deuh, iran miphun/ Shia Islam nih Iraq ram ah milu tlawm deuh a simi, Saddam Hussein cikor, Sunni muslim pawl teirul cham bantuk in an phawmh hna. An hruaitu pawl an von thah hna. Cu thawng cu Vawleipi ah a puak i, US, Canada, Europe tbk ah khua a sa cangmi, Sunni Muslim pawl thinhunnak cu mei alh in a alh.

Bush chan lio ah thawng an rak thlak balmi, Abu Bakr al-Baghdadi nih “Islamic State of Iraq and the Levant (ISIL) tiah 2014 ah Islam State/Muslm Ram ser dingin buu a von dirh i, Sunni Mulsim pawl nih a but in an but i, Syria cheu khat le Iraq cheu khat ciah Islamic State cu an dirh. US, Canada le Europe tbk ah khuasa cia, Sunni Muslim mino tampi cu ISIS ah an lut i, President Obama nih a tei kho ti hna lo. Vawleipi khuaci a mui ko. Sualnak ngeilo Khrifa le biaknak dang tampi nunnak a liam. TVs le Video ah hngawng tan lio video cu internet ah a khat. Kengkip ah Suicide bomb a puak. President Obama’s a foreign policy sungh/ failed mi nih a chuahtermi buainak/ISIS hnawmtam cu a fim kho ti lo.

President Obama chan (2009-2016) uknak cu a dih i President Trump nih uknak cu a von lak. President Obama nih a roh tami ISIS ralhrang cu caan sau rauh loin a thianh/cleaned up dih. An hruaitu “Abu Bakr al-Baghdadi” cu Syria ram ah a thah. A ralkap thong tampi cu a tleih hna i, thong ah a khumh hna. Araba ram ah US dohtu ralhrang tirawl lei hriannam a petu, Iran Major General, Qasem Soleimani zong Syria ah a thah rih. Trump chan ah ISIS cu a den cikcek hna.

President Trump chan, (2016-2021) cu thaizing hi a dih cang lai i, President thar Joe Bidden nih uknak cu a von lak lai. Bidden Foreign Policy hi zeidah a lawh lai hngalh a si rih lo. Iran ram cu al-Queda kua thar/ Safe Heaven a si cang i, nan ralrin a hau tiah Trump Cozah nih ralrin an pek ta. Bidden chan ah ISIS hi an rak corh tthan te lai maw? US President kip nih challenge/ harnak an tonmi hi aa dang cio i, Bidden nih zeibantuk challenge/ harnak dah a ton ve te hnga? Obama nih Trump cu ISIS a roh ta. Trump nih a thianh dih. Trump nih Bidden cu, Covid19 a roh ta ve. Bidden nih thate in a thianh khawh ve ko lai. Catialtu: Zasang Cinzah