NSCN-K Ralbawi Ngan A Si Mi Captain Chusimu Cu Leirawi Nak In A Nunnak A Liam

Naga Socialist Council Of Nagalim-Khaplang (NSCN-K) ralkap chung ah ralbawi ngan pakhat a si mi Buci Chusimu cu nizan May 18 ah khan leirawi nak in meithal in an kah caah a nunnak a liam tiah NSCN/GPRN nih tuchun ah thawngzamh nak an tuah.

Buci Chusimu hi naih tein an rak kah mi a si i a hmun ah a nunnak a liam cawlh, cun meithal in an rak kah lio ah hin a kuttang mi pa he an si ko nain meithal an i put veve lo caah a kuttang pa pakhat zong cu a ke kiak lakin an khen ve a si tiah an langhter.

Buci Chusimu an kah nak kong he pehtlai in NSCN-K ralbawi le nawl ngeitu hna nih an chim mi cu “Kan sinah Tisary Region hmunhma hi pek kan si caah Buci Chusimu hi nawl ngeihnak sangbik a ngei mi a si. Cu ruang ah kan ngaihchia tuk hringhran i bochan mi le hngatchan awk tlak rawlbawi tha le hruaitu tha pakhat kan sungh hi cu a poi ko. Zeibantuk ralkap le hriamtlai phu nihdah an kah ti hi kan theih khawh rih lo caah kan hlathlai cuahmah lio a si ko” tiah zong an chim.

Tisary Region hi Myanmar ramchung Sagain ram then ah a um mi a si i anmah tein uknak a la cang mi hna an si. NSCN-K pawl an umnak hmunhma hi Layshi myohne Motawfam khua ah a si. Buci Chusimu hi fa pahnih a ngei mi zong a si i amah hringtu a pa hi ralbawi ngan pakhat zong a rak si ve. Kan ram le miphun caah kum 10 chung zumh tlak te le bochan awktlak tein riantuan mi le nunnak a pek mi a si caah kan phlh kho hrim lai lo tiah zong NSCN/GRPN nih cun an chim.

Ref: Mizzima – News in Burmese

 145 total views,  1 views today

This function has been disabled for Chin 11 News.