NLD Party Chungtel Si Hi Ningzak A Si Ko Cang

NLD party si hi ningzak a si ko cang. Nai hrawng NLD party le Kawl pawl nih Suu Kyi kan dirpi tiah an au lengmang. Kawlram khuapi Yangon le Neypyiraw pinah a dangdang ah an au nak tampi a um.

Hakha i NLD MP le party pawl zong au an duh tuk ve ko lai nain an ningzak deuh rua au taitai cu an i thlachiat rih hih. Au te hna zong sehlaw theih lo a si kho.

Hi tluk in miphun tlawm kan cihmih a kan tim tu le a kan namnet mi Kawl ralkap sualnak vawlei pi nih a hun theih i vawlei biaceih zung ICJ ah an hun chuah pi lio ah NLD hruaitu Suu Kyi le a misa pawl nih an dirpi bak ko hna. Suu Kyi hrimhrim kha taza an cuai ve. Nangmah nih cozah na tlaih ko nain ralkap hi na sica hna lo, tuah hlah uh tiah kaa khat zong na thloh hna lo. Na thohkhan hna tiah taza an cuai bak ve.

A dihdonghnak biaceih zung taktak a hun phak cu Kawl le Kawl cu an i dirpi bak ko. Tlangcung mi cungah ralkap tuahsernak vialte hmaimilh piak an timh cang hna. Ralkap sualnak vialte Suu Kyi nih a fimthiamnak in thuh piak a timh cang hna. Tangka tamtuk dih in an mawh pawl ruangah rampi tangka hman a si. Sihni an i hlan.

Chinram ah a ummi NLD party pawl kan ruah awk a za cang. Kan i ruah ngam lo si le kan hmai tal kan i huh  a hau ko cang hih. Tlangcung mi kan covo a kan chuh tu le a kan rialdip tu ralkap lei ah NLD party pawl cu an tang dih cang tung. Cucu maw a dik mi demicracy ee cu ee kha ee kan timi Kawl thluak nih hlenmi NLD party si hi ka duh bak ti lo.

Cu chinchap ah Pi Ni Sui Lian nih kan hnu ah khan NLD ahhin Chin miphun i fun ko hna usih a ti hoi cu loh bak si ko. Mahhi ralkap pawl a dirpi tu le a kan thah a kan nawngtu ralkap sualnak a hup tu le a dirpitu NLD party lei ahcun maw kan i fun rih lai. Kan hrut ti lo ee.

Chin mi hna kan lungfim a hau cang. Kum 70 reng lo Kawl thluak hi ziah kan theih khawh bal lo. A tuktak Ngapih le Cite luklak in lem khawh mi kan si awk a si ti lo. Ram a daih lo ahcun zeizat hmang tangka um seh a thangcho mi ram ser khawh a si lo. Daihnak kan herj hmasa. A kan rialdip tu ralkap le ralkap lei ah a tangmi NLD hi kan tei hmasa hnu lawng ah kan miphun nih daihnak kan hmu lai thanchonak kan hmu kho lai.

Tlangcung miphun kan hawi le hmai khah bak a si lo. Kannih Chinmi nih NLD kan uar tuk rih mi le tlangcung mi dang nih NLD zei hmanh ah an hei rel lo ning tuak ahhin zangfak hna kan si pah. I pheh awk le thuh awk tha lo in NlD piber nih  tlangcung mi a kan thah tu, kan biainak vailung a phurtu, Laica canwg kho loin a kan tuah tu, kan meichung sapherh a  fir tu, nu tleihhrem hmang, khuabawi tleih le thongthlak a hmang tu Kawl ralkap cu a dirpi ko cang hi teh. Ka ningzak ngai.

 

 346 total views,  1 views today

This function has been disabled for Chin 11 News.