NLD Cu An Thil Tuahmi Ruangah An Mualpho Taktak!

A NUNG KAN PATHIAN DAH TI LO CU AHO PATHIAN HMAI HMANH AH KUN IN KAN BIAK HNA AWK A SI LOH – Johnly Fambawl

* 1Johan 3 . 4 – Sualnak a tuahmi paoh nih Pathian nawl a buar a si; zeicahtiah sual cu nawl buar a si..

* Exodus 20 : 3 – Keimah hlei in pathian dang zeihmanh nan bia lai lo..

• Mah hi hmantlak an post mi ka hmuh bak cu zeibantuk thil a si zongah ka lung a fak ko. Laimi Pathian leiah zumtu kha kan si kan ti tung. Ziah mah bantuk tiangtiang cun a chuah kun hnga ee ti kong hi khua ka ruat zungzal. Cathiang chungah kan hmuhmi cu, “Sualnak a tuahmi paoh nih Pathian nawl a buar a si; zeicahtiah sual cu nawl buar a si,” a ti. ( 1Johan 3 : 4 ). Cu sualnak kan tuahmi cu zeidah a si kun? Cathiang nih zeitin a kan ti? “Keimah hlei in pathian dang zeihmanh nan bia lai lo. Vancung i a ummi thil si hna seh, vawlei i a ummi thil si hna seh, ti chung i a ummi thil si hna seh, vawlei tang i a ummi thil si hna seh, cu hna mui he aa lo in siasal zeihmanh nan i ser lai lo. Zei bantuk siasal hmanh an si ah an hmaiah nan kun lai lo i nan bia hna lai lo, zeicahtiah keimah hi Bawipa nan Pathian cu ka si i nahchuah a ngeimi Pathian ka si. A ka huatu cungah cun chan thum chan li tiangin an tefa hna cungah khan dantatnak ka tlunter. Asinain a ka daw i ka nawlbia a zulmi hna cungah cun chan thong khat tiangin a fekmi ka dawtnak kha ka langhter,” tiah a ti. ( Exodus 20 : 3 – 6 )..

• Minung nih sualnak tuah kan timi hi zeidah a si? Amah Pathian zumh lo kha a si. Kan zumh lo caah a bia zong kan ngai duh lo. Kan caah tih a nung tuk. Zeicatiah “Cun Bawipa nih Moses le Aaron cu, “Nan ka zumh lo i Israel mi hna mithmuh ah nan ka thianter lo caah, cucaah nannih nih cun hi mirun hi ka pekmi hna ram chungah nan luhpi hna lai lo,” tiah a ti hna. ( Number 20 : 12 ). Cun Jesuh hrimhrim nih zeitin a ti rih? “Nan pa khuachia hrin ciammam nan si caah nan pa duhnak tuah kha nan duhmi a si. A hramthawk tein lainawng a si i biatak ah a dir bal lo, zeitintiah a chungah biatak a um lo. Lih a chim tikah amah kotho khan a chim, zeitintiah mi lihchim a si i lih vialte pa a si. Sihmanhsehlaw ahmaanmi ka chim i nan ka zum lo. Nanmah lakah aho nih dah misual na si, nan ka ti? Biatak ka chim ko tung ahcun zeicahdah nan ka zumh lo? Pathian mi a simi hna nih cun Pathian bia an ngaih tawn, nan ngaih lonak hi Pathian mi nan si lo caah a si,” a ti hna. ( Johan 8 : 44 – 48 )..

• Cucaahcun kan ram le na miphun thanchonak ca ding zongah siseh, na innchungkhar thanchonak ding zongah siseh, a dangdang zongah siseh a nung kan Pathian kal takin a dang pathian upatnak kan pek i kan kun kha cu a thami a si loh ti kha kan thih hlan lo philh hna hlah u sih. Minung phun menin ka kun ko ee. Ka thinlung tein cun Pathian sinah thla a cam ko kan ti men hnga? Cucu kanmah le kanmah kan i hlen i Pathian hmaiah sualnak kan tuah a si. Pathian nih hin sual zungzal dingin a kan au loh. Mi thinghlim si ding tuah a kan auh. Cucaah hi cawnpiaknak zulh a duh lomi cu minung cawnpiak nak zulh duh lo si loin Thiang Thlarau a kan petu Pa Pathian cawnpiaknak kha a zulh duh lo caah a si tiah Cathiang chungah kan hmuh. “Pathian nih sualnak tuah lengmang dingin a kan au lo, mithiang si ding tu ah a kan auh. Cucaah hi cawnpiaknak zulh a duh lomi cu, minung cawnpiaknak zulh a duh lo si loin, Thiang Thlarau an petu hna Pathian cawnpiaknak zulh a duh lo kha a si deuh,” tiah kan hmuh. ( 1Tesalon 4 : 7 – 8 ). Cucaahcun a nung kan Pathian dah ti lo cu aho pathian hmai hmanh ah kun in kan bia hna awk a si loh..

• Nan hmanthlak ka post chih ruangah nan thin lung fak hlah seh. Zeicatiah kan Laimi nih kan i sunghsak bikmi Lai thil he Satan hmai ah upatnak in na kun i na biakmi thil kha na Laimi phun hawi nih hin in hmu ve hna seh law zeitik hmanh ah hi bantuk thil hi tuah um ti hna hlah seh. Cun nangmah zong nih va tuah ti hlah..

• Careltu nan dihlak cungah Pathian nih damnak le hlawh tlinnak thlachuah in pe ko hna seh..

 170 total views,  1 views today

This function has been disabled for Chin 11 News.