NLD Cozah Nih Zung An Sak Ter Hna Nain Riantuan Man An Pe Duh Hna Lo

Chin ramkulh Mindat khuapi ah NLD acozah zung cu an sak ter hna I an lim cang. Asinain zung an sak mi nihlawh (wage) Ks ting 50 cu an pe duh hna lo nak hi nihin he cun thla 3 nak a si cang tiah zung (NLD Office) satu hna lak ah an hruaitu a si mi U Win Aung nih cun a chim.

U Win Aung nih a chim ning ah cun “kan riantuan man hi zung kan on bak in kan I pek cawlh hna lai tiah an kan ti ko nain zung an on nak zong cu a sau tuk ko cang nain an kan pe hlei rih lo. Kan hngak deuh rih ko uh an ti than I kan hngah lengmang hna caah nihin cun thla 3 nak a si. Ka riantuan hawi, ka kuttang mi hna zong hi an tam ngai caah keimah nih tangka pek chung awk ka ngei fawn hna lo.

Cu ruang ah keimah fello le hrawkhrol ah an ka ruah caah ka kuttang mi lila nih report an ka tuah than ve cang caah lungrethei ngai in ka um ko. Keimah zong nih NLD cozah pawl cu lungsau tein ka hngah ve ko hna nain thla 3 chung a si cang caah lungrethei ngai a si ko. Hi bantuk in pulrai zawtnak le lockdown lio a si fawn caah ei-din ding cawk nak ah an herh ve cio mi nih le a si fawn” tiah a chim hi a si.

Hi NLD zung an sak mi hi 2019, December 4 ah khan an rak sak dih cang mi a si I 2020 February 24 ah khan zung on nak le zung kai nak zong an rak thok cang mi a si.

Mindat NLD party zung saknak kong ah party lutlai pakhat a si mi U Thang Ling nih a chim ve ning ah cun “zung an sak mi an kong ah 2019-2020 thil man sining he cuaithlai tik ah an nihlawh man hi a fak tuk hringhran. Cu ruang ah zung an sak mi kong le an cazin zohthan zong kan herh ngai mi asi” tiah zong a chim ve.

Cu ruang ah zung saknak h ai tel ve mi hna cheukhat nih cun an zei party an si hmanh ah riantuan an kan fial caah kan tuah mi a si I kan riantuan man cu tha tein an kan pek ding a si tiah an chim.

Ref: Chin World

 146 total views,  1 views today

This function has been disabled for Chin 11 News.