Ningzah Hngalh Caan A Cu Tuk Cang Lo Maw ?

Rakhine le Chin, miphun dawtnak le tanhnak ah kan dirhmun tawi padet te in zohti hna usih. 2015 thimnak Rakhine ah miphun party nih thutdan tambik in 20 leng an laak. 2015 thimnak Chin ah ZCD chim lo, Chin party pakhat hmanh nih thutdan an hmu lo.

Chin miphun party nih teinak a hmuh lo ruang ah remdaihnak civuipi ah an i tel kho ti lo. Cuti an i tel lo ruang ah miphun dang sin ah nehsawh kan tong, mithmai a bi. Chinmi cu anmah miphun dawt le tanh lo in Kawlpa chakrenghmi party tu an tanh caah ramkhel biaruahnak ah miphun aiawh in bia an chim kho ti lo ti a si (Chinram NLD le USDP nihcun Chin miphun lungput le lunglai chuak bia zeihmanh ramdaihnak civuipi ah an chim bal lo). Cu ruang ah ningzak taktak khi kan si.

2020 thimnak ca ding Rakhine ah NLD party in atu tiang aa cuhtu ding sohhlua a chiami 7 lawng a um rih. Phundang in kan chim ahcun thutdan 40 leng i cuh dingmi ah NLD in minung 7 lawng nih an chiah rih. Zeitluk in dah NLD nih Rakhine miphun an tih hna ti kha fiangte in a lang.

2020 thimnak ca ding NLD party in aa cuhtu ding hi Chinram huap cu chim lo, Hakha peng thutdan 5 ca te lawng hmanh ah sohhlua a chiami 15 an si. Rakhine ah miphun dawtnak a thang i Chinram ah Kawlpa bochannak a thang chinchin ve. Phundang cun Chinram ah sal lungput zor loin a thang chinchin rih. Sal lungut cu mah le mah i bochan ngam lo in midang bochan le mi ke in dir i mi pekmi paoh aa lawm khimmi khi an si.

Rakhine cu miphun ah an i thanghphawk, an hmin nain Chin miphun cu mah miphun party tanh le dirpi lo in Kawlpa chakrenghmi party kha kan coka le kan inntual ciacia ah kan i bochan in kan tanh deuh rih hna.

NLD party lutlai U Win Htein nih, 2020 thimnak ahhin Rakhine le Shan ahcun kan party nih teinak kan hmu lai ti kan i zum bak lo, a ruang cu miphun dawtnak ah thukpi in hram an thla cang a ti. Ramkulh dang ahcun kan party nih teinak kan hmuh rih ko lai a ti. A chim duhmi cu Chin te hna cu miphun dawtnak le tanhnak hram an thlak rih lo ca le an chakmerh khawh rih an si caah kan party nih teinak kan hmuh rih ko lai ti khi asi.

Cucaah, kan tappi le kan inntual buainak le sersiamnak kongkau ahcun miphun dang pa nakin kanmah le kanmah i bochan in kan i dirkamh deuh awk a si ve cang lo maw? Miphun dawtnak le tanhnak ah sal kan lawh rihmi hi na ning a za ve rih lo maw? Kan innchungkhar buainak le sifahnak phisin nak ding ah kan innpa asiloah khualpa maw kan i bochan in rak kan tlangtlak ko kan ti peng rih hna lai?

Chinmi nih miphun dawtnak le tanhnak ah thukpi in hram thla ve cang hna usih.

Salai Holy Tawk Tling Thang

 193 total views,  1 views today

This function has been disabled for Chin 11 News.