Sagaing ramṭhen, Kalaymyo khuachung ah, nihin April 16 ah SAC ralkap uk duhlonak langhter in mino nih lam an zawh lio ah SAC ralkap nih an ṭhencheu hna i, lamzawhnak aa tel mi 4 tlaih an tong, tiah theih a si.
Nihin April 16, mipi nih lam an zawhnak ni 799 ah, Kalaymyo Tada Oo pawng ah SAC ralkap dohkalhnak ca taar ding in a chuak mi mipi hna cu an i timhtuah lio ah SAC ralkap nih an hmuh hna i, lamzawhtu mipi cu an ṭhencheu hna, tiah lamzawhnak ah aa tel mi hna he naihniam in ummi nih an chim.
“Kalaymyo ah cun SAC ralkap nih hramhram uknak a lak thawk in ni khat hmanh lamzawh le uknak duhlonak langhter an ṭhul bal lo. Nihin cu thawngpetu an um ruang ah a si kho men, lamzawhtu hna ṭhencheu le tlaihkhih an tong.
Lamzawhnak ah aa telmi Ma Ei San cu SAC ralkap nih kah ding in nawlchuah mi a si pin ah tlaih ding in nawl an chuahnak zong a sau cang,” tiah lamzawhnak ah aa tel ve mi hna he naihniam in ummi pakhat nih a chim.
Nihin lamzawhtu lak ah Ma Ei San, Ko Myo Ko, Ko Gua Toe le Ma Kin hna cu tlaih an tong i, Kalaymyo dah-kah-sah ah an kalpi hna, tiah theih a si.
Kalaymyo lamzawhnak ah aa tel mi phu hna nih tutan tlaih a tong mi hna he pehtlaihnak a ngei mi cu caan karlak chung a rannak zaam chung ding in ralrinpeknak thawng an thanh hna, tiah theih a si.
Crd… TCP
Leave a Reply