Nihin ah Matupi le Mindat karlak motor lam, meng 14 pawng hrawng ah Uico Ralhrang le CDF Pasaltha karlak raldohnak a chuak. Nihin zinglei suimilam 7:00PM hrawng in kahnak a chuah hi a si i Ralhrang lei pahnih an thih lawng si loin, a dang 4 leng nih hliamhma fak an tuar tiah theih asi.
Cu lawng si loin Mindat khuapi thlanglei, Yat Ywa le Ya Yaw khuate pawng zong ah kahnak a chuak rih. A si nain nihin kahnak ah CDF Pasaltha lei cu an nunnak a him dih tiah theih asi.
Hi kong he pehtlai in Mindat khua mi pakhat nih “Ralhrang lei nih Sitcawng pathum nak tlawm loin an kan doh, hmunthum in an rak kan luh hnawh. An i kaap, chikhat an ngol i an i kaap nolh tthan ti bantuk a si. Cu caah thaizing zong hi nak in raldohnak a zual deuh kho dirhmun a si ko” tiah a chim.
Nihin raldohnak ah CDF pasaltha pawl cu Pathian nih a venhim hna, an nunnak a him dih ti asi. Pathian nih dirkamh chin hram hna seh.
Relchap: Ralhrangbu Nih KNU/KNLA Brigade 1 Township Office An Lak Mon ramkulh Tathung pengkomh chungah Mawsako ah a um mi KNU/KNLA brigade-1 township office cu ralhrangbu nih August 11 ah an lak tiah KNLA brigade 1 sinin theih a si.
August 11 hi KNU/KNLA brigade 1 lutlai Brig. Saw P’Le ruak vui ni a si i, zung riantuan hna cu ruak vui nak caan hman dingin an kal hlan ah ralhrangbu nih atu bantukin an lak mi hi a si. Zungah a um mi KNLA ralkap 3 zong an tlaih hna tiah KNU Tathung pengkomh chungtuan P’do Saw Soe Myint nih a chim.
Battalion phun zong a si lo, Brigade nih peng palek bantukin a chiah mi a si, tuanvo ngeitu pakhat le ralkap cheukhat an um.Tam zong an si lo, cheukhat ruak vui nak ah an kal lio ah ralhrangbu nih mawtaw 4 in an luthnawh mi a si tiah a chim.
Ralhrangbu nih zungah a ummi ralkap 3 an tlaih hna pin ah an pawngah tisik anhnah le satil suami 12 zong an tlaih hna i, atu tiang an thlah rih hna lo tiah theih a si.
Mawsako peng hi KNU nih 2015 NCA min an thut hnuah a thar in an sersiam mi peng pakhat a si i, peng zung hi Pawng peng Te-in le Kataik khua kar ah a um mi a si.
Nai hrawngah KNU/KNLA brigade 1 hmun chung Tathung, Bilin, Kyaitung le Pha-an peng le brigade 5 hmunhma chungah ralhrangbu le BGF fonh in thazaang chap in cawlcanghnak an tuah tiah theih a si.
Ralhrangbu nih zung chung hriamnam cheukhat le cycle, mawtaw le phaisa zong an lak tiah brigade- 1 hruaitu pakhat nih a chim tiah Mon-Karen people media nih a tial.TCP
Leave a Reply