Ngaih A Chia Taktak Ko Ee: Meithal Le Hriamnam Neih Lo Ruangah Mipi Ralkap Phu PJ Pawl Raldoh Nak In An I Din Cang Ee

Ngaih A Chia Taktak Ko Ee: Meithal Le Hriamnam Neih Lo Ruangah Mipi Ralkap Phu PJ Pawl Raldoh Nak In An I Din Cang Ee

Meithal ralthuam bawmnak ngah lo ruangah PJ mipi ralkap in Ral Do colh san

Sagaing ramṭhen, Yinmapin hrambun Pale Joker mipi ralkap cun meithal bawmnak an dong lo ruangah March 6 ihsin raldo kan cawl ti`n thuthannak an tuah.

Pale Joker ralkap cun Yinmapin peng ah Dothleng raldonak a um hlanpi ihsin rak din zomi pawlkom an si thu siseh, NUG hnen ihsin meithal ralthuam bawmnak kan ngah lo ti`n thusuahmi ah tarlang tel a si ih “ral do kan cawl san bik cu NUG hnen ihsin ralthuam meithal pakhat hman kan dong lo ruangah a si” ti`n an sim.

Ṭuanvonei mipakhat cun “meithal keng in ral kan tho pek ahcun leiphum bomb hi kan hmang tlangpi bik ih kut tuah meithal siava te thawn ralhraang kan do”.

“Pengpi ralkapbu pakhat dinhmun in NUG hnuai ih um lo pawl cu meithal ralthuam bawmnak an ngah lo ding ti`n daan a um ruangah harsatnak phunphun pah tlangh in NUG thla hnuai ah kan lut.”

“Yinmapin tatyin 19 ti`n NUG MOD hnuai ah kan um hnu ah mah le mah humvenawknak hrangah meithal ralthuam kan dil nan bawmnak zianghman kan ngah lo.”

“Ralthuam tlasam le sumsaw harsatnak ruangah raldo cu kan cawl nan kan tuah thei sun bomb tuah cu kan ṭuan pehzom hrih ding” tiah a ti.

Hivek harsatnak ruangah Khuasung mipi ralkap siseh, Khualeng hrambun mipi ralkap lakah raldo colhsantu an um hnih-thum zo a si.

Relchap>>>>>>Ralhrang Mawtaw 30 In Chinram An Pan
Kalaymyo in ralhrang mawtaw 30 pawl cun March 9, tuizing ah chinram an pan ih Tedim peng Theizang an thleng ti’n thuhla theitu pawl cun an sim.

Ralhrang mawtaw 30 lakah tank 2 le ke 12 nei mawtaw khal an tel. March 7 zing khalah ralhrang tam zetin ke in Chinram Tedim peng an rak pan zo. Doawknak suak thei ringring a si ruangah mipi pawl kan fimkhur pei uh.

Relchap>>>>>Delhi Ih Myanmar Raltlan Sualpi cu A Pasal Ih Rak Phuah Men A Si
India ram New Delhi khawpi ih Myanmar raltlan pakhat cu Auto Driver telin mi 4 in an hruai hloh hnuah an sualpi ti’n March 1 ah thubuai rak ngankhum a si.

Thubuai thawn pehparaw in palik pawl cun nasaten zingzoinak an nei ih, neta ahcun a pasal in a nupi tlan a hmuh lo ruangah mi 4 in a nupi an ru ih an sualpi ti’n Delhi palik hnenah a rak hek. Nupa karlak buainak ruangah sualpi thubuai vekin an rak tuahmi a si ih, tu ahcun thudik an theih zo ruangah thubuai an ngankhummi khal an kharsal.

Delhi palik cun “Thuhla kan zingzoi fel tikah Rohingya raltlan an rak si ih, an pa sawn in thubuai a rak thehlut. An nupa tongkam elawk ruangah a nupi a tlan ih a rualpi tei inn ah zan 2 a riak hlo. A nupi zan 2 a riah hlo ruangah a pasal ti ngaihnak thei nawn lo cun palik hnenah a nupi hlo vekin le mipa 4 in a nupi sualpi vekin thubuai a rak thehlut.

“Cumi ruangah Delhi palik pawl khalin thubuai kan rak ngankhum. Tu ahcun thudik lo, puahcop men, a nupi hmuh duh tuk ruangah thuphanpi in palik rak theihtermi men a si ruangah, thubuai khal kan khar zo a si,” tin a sim.

Delhi ih Chin raltlan pawlkom Sungtel pakhat cun “Thuhla kan thei veten kanmah CRC sungtel Community 12 pawl cu thuhla kan sut aw ciamco ih, kawhhran tin khal thuhla kan sut aw ciamco. Cutikah kanmah chinmi lak ahcun cuvek sualpi tong an um thu kan thei lo. Kan mangbang tukih palik hnen tiangah thuhla kan sut fel. A tawp ahcun Chinmi siloi Rohingya an rak si ih, nupa tongkam elawknak men ruangah a nupi tlan hlo cu midangih sualpi vekin thu a rak thlen. Hivek cu Myanmar raltlan hrangah a tha lo tuk lawlaw. Ziangahtile, neta ah thudik a um pang asikhalle palik lamih ngaihsak an si lo phah dingih a poi tuk lawlaw a si,” tin a sim.