Nau Chuakka Faphir Pahnih Cu An Zuat Mi Uico Nih Thi Lakin A Seh Hna

Brazil ram ah bawhte chuakka faphir hna unau te cu inn chung ah an zuat mi Uico nih seh hna ruang ah an pahnih tein an nunnak a liam tiah thawngzamh nih an langhter.

Hi kong hi Brazil ram Bahia pengkulh chung ah a um mi Piripa khua ah nuva hna nih faphir an hrin mi hna pahnih te cu siizung in an rak loi pi hna hnu ah an Uico nih a seh piak hna hi a si tiah an langhter ning a si. Nuva hna nih faphir an hrin mi hna hi an thlahnih an tling deuh rih lo, an Uico nih cun faphir hna an pomcawi mi cu a hmuh lengmang hna tikah hnah chuah ngei le ing puan in a um hnu ah thi lakin a seh piak hna hi a si.

Uico nih a seh hna lio ah hin mileng an rak ngeih caah mikhual umnak khan (living room) ah an thu hna I faphir hna unau te cu ihnak khan chung ah an rak ihter hna. Hngakchia an tah thawng cu hringtu nu Elaine Novais (kum 29) nih a theih le cangka in room chung ah cun a lut cawlh ve ko nain Uico nih cun faktuk in a she cang hna caah a chanh manh ti hna lo hi a si.

Uico nih a seh hna ruang ah pakhat deuh hi ihnak khan chung ah cun a thi cawlh I pakhat tu hi cu siizung an phak pi manh ko nain a thaizing ah a nunnak a liam than ve. Hi hna nuva nih hin an I um hnu kum 9 nak ah fa an ngeih mi zong a si caah hringtu nu Elaine Novais cu a ngaihchiat a celh lo I siizung ah an zohkhanh lio a si ve tiah thawngzamh nih an langhter.

Source: Akon Thi

 188 total views,  2 views today

This function has been disabled for Chin 11 News.