Nargis Bawmhnak In Thil Ti Kho Pahmi Pawl Ceilak An I Rumnak!

Nargis bawmhnak in thil ti kho pahmi pawl ceilak an i rumnak. Puicimh lio zong phaisa vaivuan ti a si, a har takmi nih an tingco lo. Democracy kum hra hrawng chung ah thil ti kho pawl, mps chungkhat pawl an i hlorh i zaran cu siifahnak in an luat hlei manh lo. Chinchap ah cozah rian zong a si lomi lothlo, thingphur le zingzan ei ding dum a tuahmi hna zong Democracy cozah nih an dum le an lo an chuh dih hna mitthli he an i ciah.

Democracy cu a caan tawi ti khawh si, nain caan sau tuk uknak chia tang ummi miharsa hna caah theihthiam a fawi lo. CDM caah ramkip nih thawhmi phaisa zong duhning in kuat khawh a si rih lo. Pumpak in chungkhat kuat hmanh phaisa hlam tikah tamtuk an rak lak hna ti a si. A system ah silo in a minung ahhin a si ko tiah ni ca ṭuanmi pawl le siifak lung ah a um cang.

Cozah rianṭuan vialte ramdang in chungkhat bawmtu ngei lo bu in chungkhar cawmtu si zong ah CDM ah i paih dih ding a si tiah fakpi in kan au. Heh an mual kan phoh hna. CDM lo ah cun Khrifabu le khua hmanh in dawi dih ti a si. Cucu an ṭih i CDM cu an lut ko hna cheukhat cu. Ṭihnak ciocio.

Democracy cozah zong nih kum 10 chung ah rammi lung a lak kho taktak lo. Riansok ah thiamnak nakin phaisa tam chuah a hau rih. Politics ah i ruannak a um hlei lo, public he ai pehtlaimi pawl ah i ruannak a um lo. Ai dannak hi hmuhning le tonning ai dang cio lai. Mirum, mi sikho le bawi chungkhat nih an tonmi thlennak le siifak le zaran nih an tonmi ai dang. Nihin i kan tonmi kong ah mifim, mirum, catang ngei le political platform a ngeimi pawl nih biachim holh rel i ralrin deuh ngai a herh.

Minung cu zapi ca, ram caah khua an ruat kho dih cio lai lo nain an pumpak le chungkhar ca cu an ruat cio. Kum khat ca an ruat kho kai lo, nanmah bantuk an si lo caah thaizing ni khat ca lawng an ruat kho men lai siifak nih cun. CDM hi Non-violent movement a si. Ralkap hmanh nan NonViolent in na doh ahcun na pawngkam khuami le rammi sawh kha Violence hman hnawh hlah. A lung thlen khawh i zuam, na tuahmi kha in hmu seh ralkap he nan i dannak kha, hrocer le ṭhihphei na dohmi kha thei seh. A caan um lo ti hlah, ziah a caan a um lo na ti? Sungh ding na ngeih ruang ah a si kho men.

Kei zong ka chungkhat, ka chung chuak zong Kawlram ah an um hna. Hi ram buainak hi caan saupi a rau lai. Uknak chia dohpah in mi harsa bawmh ding an tampi te lai, lung lak le thlen ding an tampi rih lai. Nangmah ruahning bantuk a ruah lo ruang ah a tuah lo ruang ah Officer a si lomi, reeng a ngei lomi, amah kong pin zei kong hmanh biakhiahnak nawl a ngei lomi, public figur a si lomi kha nan nawnnok hna a si cun na dohmi he = nan si ti kha thei ko.

Mah hi ka chim lai paoh ah khua ka ruat ta: CDM a tuah rih lomi cozah rianṭuanmi vialte hi ka ca nan hmuh cun CDM ve ding in khua rak ruat ve cang. Nangmah thawng in kan ram uknak chia dohnak thazang a ṭhawngdeuh hrimhrim lai. Duh thimnak na ngei, a si nain zeiruang ahdah hawi CDM an tuah timi ṭha tein rak ruat ve sawh cang. Catialtu: Si Bawimang Lian