Nan Pu Trump Cu A Mual Pho Taktak! A Hrut Ko Rua!

“Chinese Virus” timi biafang

Nizan ah US President Donald Trump nih atulio Coronavirus zawtnak hi amin tein hei chim ko loin “Chinese Virus” atimi kha cu aluan bak tiah ka ruah ko. Hi tluk in mah zawtnak nih miphun thleidannak achuahter sual lai ti phan lio ah US ram hruaitu pi nih miphun min bunh in “Chinese Virus” ati ko ahcun midang chin chin nihcun zeitluk in dah China le Asia pawl an kan hmuh cang lai. US ramdang lei vuanci țuan lio mipa Mike Pompeo nih ai thawh ve rih i “Wuhan Virus” ati ve hoi. Ram uktu si lio ahcun hi bantuk bia cu an i suum awk hrimhrim asi. An mah lawng an i tonnak hna ahcun hei chim hna seh law phundang asi.

Naite ah China ramdang lei vuanci zung nih atulio Conronavirus zawtnak hrik hi “US ralkap nih nan vun phurh i Tuluk ram ah nan vun kan thlah hnawh mi asi” an ti ve hoi. Donald Trump nih President arak i cuh lio ah China ram in US company vialte kan laak țhan dih lai arak ti. Cucu atlin nak ding ahcun China ram thil chuak ah zawtnak hrik aum ti in ahohmanh nih China thil chuak cawk ngam lo ding in US nih an tuah hna te hna lai tiah an lunghrinh hna. Cu bantuk cu zumh aum lo kan ti lio pi ah Coronavirus achuak ve tak i US le Europe ramkip ah China thil chuak chim lo, China cu an minung hmanh țih dih ding in an um cang tiah an țial mi atamtuk lio asi. Cu lio ah Donald Trump pumpak nih “Chinese Virus” avun ti rih chinchap hi cu apoi taktak ka timi asi.

Vuleicung ah akarh ning afah tuk ning hi lung lei ahring cang. Thawngpang vialte hi kong nih akhuh dih cang. Vulei dang nih hlah maw ral an kan tuk ti awk in kan um cio lio hna asi. Ahram thok tein ka chim lengmang mi hi kong cu ram uktu hna le vuleicung sipuazi lutlai pawl nih asining leng tuk in an ser chih/ an nawn nok chih mi “Politicized” thil cang asi e ka timi kha nitin alang ko. Cucaah ralrin len zong ah zapi zaran nihcun ralrin thiam ding zong khi asi cawk lo. Mit/hnar tongh lo ding le kut țawl lengmang kong ahcun zapi cu an kan khumh viar rih ko.

Nizan in khan Washington State, Seattle ah Covid-19 tlangrai zawtnak in hmailei i khamhnak caah test an thok. Minung 4 an chunh hna. Hihi tlamtling ahcun hmaikum incun zapi nih tlangrai khan sichunh (Vaccination) tuah khawh dawh cio asi cang lai i ațhatuk hnga. Cun Australia i Peter Doherty Institute nih hi zawtnak hrik umtuning an hmuh mi le Wuhan in arami kum 47 Tuluk mizaw nu an damh dan an zoh tikah țih ding asi lo tiah an thanh. Kan pum chung i ummi zawtnak arak tei ve tu kan thisen “Immune System” nih hin amah tein atei khawh mi asi ko an ti. Vulei cung nih an lomh pi ngai hna pin ah cozah nih asi khawh chung in bomh an timh hna. Tuluk mirum Jack Ma zong phaisa ahlut hna tiah theih asi. Amah belte zei ruang ah hi hrik in azual tuk mi an um i athih zong an i thih pi timi tu cu vun kawl rih ding rian (Next Step) kan ngei rih e an ti. Ka chim cia bang April 15 hrawng cun afiang deuh ngai cang lai. Dawr kip thil kong ah lau hlah uh, arannak in cozah kan cawl ko lai an ti dih ko hih.

Bawipa nih kan umnak hmun kip ah kan umpi cio ko seh!

Victor Khen Sang
March 17, 2029

 1,076 total views,  2 views today

This function has been disabled for Chin 11 News.