Nan Boss Pa Trump Caah Thawngpang Chia!

Polls: Trump Caah Thawngpang a Chia Chin Lengmang ko Cang
==================================================

Nehnungbik i an langhtermi national le state polls (vote peknak) a dik ko a si ah cun, Trump nih avoihnihnak thimnak buan a co ding cu thil harsa ngai a si ko cang. Thla 4 te lawng nih ai duh cang fawn tung i.

Swing states (US thimnak biakhiaktu ti tluk in a biapi mi an si) i vote peknak hmun 19 in an tuah mi ah Trump cu Biden hnu lei lawngah ai thlai peng ko rih. Republican pawl election ah an sungh bal theng lo nak hmun zongah hnung ah ai thlai ko rih ai.

NY Times/Siena College nih Thursday i poll an tuahmi ningah, Biden nih Trump cu Michigan le Wisconsin ah point 11 in a tei i Pennsylvania ah point 10 in,North Carolina ah point 9 in, Arizona ah point 7 in, Florida ah point 6 in a tei.

Poll a latu Hodas & Associates Strategic Communications zong nih Trump ca i thawngpang a that ti lo nak kong an langhter ve. Michigan ah Biden nih Trump cu point 18 in a tei, tiah HASC nih an langhter. Wisconsin ah cun point 16 in a tei i, Pennsylvania ah cun point 12 in a tei, tiin an langhter.

Redfield & Wilton Strategies nih an tuahmi poll ning zongah, Michigan ah Biden nih point 11 hrawngin Trump a tei, North Carolina ah point 6, Pennsylvania ah point 10, Wisconsin ah point 9, Arizona le Florida ah point 4 tluk hrawngin Trump a tei, ti si.

Fox News hi Trump hawi tha bik le Republicans thatnak lawngte a chimmi a si ko nain, poll a tuahtu belte cu Trump nih a thangchiat ngai ve. Thursday i anmah Trump le Republican media Fox News nih poll an tuahmi ningah zongah, Florida ah Biden nih point 9 in Trump a tei. North Carolina le Georgia ah point 2 in a tei. Asinain, khuaruah har ngai a si ve mi cu, Texs tu ah cun Trump nih Biden cu point 1 in a tei ve, ti si.

Election Day a phaaknak dingah thla 4 ai duh rih caah, poll tuahmi hi cu a karlak ah thil hi a khupthal ai thleng tawn kho ko. Trump hi White House a thut khawh rih nak dingah vote a hmuhnak dingah a biapi ngaimi state pawl ah Biden lehlam nih a tei cuahmah cang, ti cu data an khomhmi a tamdeuh nih cun a langhter ko cang.

Trump nih cornavirus a tawlrel khawhlo ruangah le rampumpi cuul in duhlonak langhter ruangah a cangmi buaibainak vialte a tolrel khawhlo ruangah a tu bantukin poll ah a mark a tlaknak hi a si, tiin Republican nih an i hman ngaimi Wall Street Journal nih Friday ah khan a chim. Tei an ka duh caah poll pawl hi a ninglo le a canglo pipi in an laak, ti phun in Trump nih a chimmi biahla pawl zong cu WSJ nih an langhter.

Poll kip nih a tu i an langhtermi pawl hi a hmanmi ah Trump nih a cohlang duh lo ti asi. Mipi nih an duhnak hi 40% tiang a tla cang i, cucu George H.W Bush le Jimmy Carter i an dirhmun nak hmanh in a chiakha deuh, tinak a si. Hi President pa hnih hna hi term hnihnak tuan awkah an duh lo mi hna lakah hehhnungbik thil cang an si.

National polls hi cu cu ti ngaingai in hmual a ngei lem tawn lo. A va ngeih ko zongah Trump cu tlak lei lawng a panh ko cang, ti cu a fiang. FiveThirtyEight website nih poll an tuah ningah, ram pumpi huapin Biden nih Trump cu point 9.3 percent hrawng in a tei, ti si. June thla awtka hrawngah khan cun point 6.2 tiang lawng a si ko rih. Real Clear Politics nih poll an tuah ve ningah, ram pumpi huapin Biden nih Trump cu point 9.5 percent in a tei, ti si.

Poll an tuahmi kip ah a dirhmun chiatkhat lei lawngte a panh chin lengmang cang caah, “poll tuahtu pawl hi a si te an si lo. Sung seh, ti an ka duh caah hranhram in poll ah ka mark an ka thumh, tiin Trump nih sual a phawt hna. Teinak kan hmu chuahmah ko, tiin amah a tanhtu pawl sinah a chim cuahmah ko rih ti asi.

Tu thla awtka hrawng i CNN nih rampumpi huap in poll an tuahmi an langhtermi kongah Trump a thinhung ngaingai. Biden nih Trump cu point 14 percentage in a tei, tiin an chim caah, ngaihthiam na ka hal a hau, tiin a ti hna.

Hi nan langhtermi poll hi vote petu pawl an thachia hna seh, tiin nan namhnul duh hna caah a si. Cun, America cul in President a tuan lio mi thazaang pek an duhnak lungthin le thathawhnak vialte hrawh nan duh caah a si, tiin CNN cu senior legal adviser Jenna Ellis le COO Michael Glasser nih ca an kuat.

Poll paohpaoh hi palhnak an ngei dih cio ko. Zeicahtiah, vote petu mitampi hna lakah mi tlawmte lawng interview an tuah hna i, hi hna pawl ni hin rampumpi huap i vote petu vialte hi an ai an awh kho hrimhrim lo, tiah Pew Research Center nih chimfiannak a tuah.

Buaktlak in lakmi an si ko caah, mikip kamlo in interview tuah kho hna u sihlaw cun tuanbia hi phundangpi a si kho mi a si. Margin i 95% chungah khin 3 percentage minus asiloah plus a um khawh caah, voi 100 tiang zong zohthannak kan tuah len ko zongah, cu thiam cu a si ko lai. Ai palhmi kha ai palh ningin a um ko lai, tiin an chim.

2016 election ningte a si ko rih ah cun, tutan poll an tuahmi pawl hi zumhraih awk an tha thlu lo, ti phun in Trump a tanhtu pawl an i la. 1972 tein khan 2016 lio i general election poll hi a kal hmang a si ko cang, tiin FiveThirtyEight i mifim pawl nih an chim.

Cucaah, a biapicem mi tham cu Election Day i mipum in a hung chuakmi pawl i vote an thlaakmi dawkaw asi ko cu, tiin an chim Trump tanhtu pawl nih cun.

 134 total views,  1 views today

This function has been disabled for Chin 11 News.