N. Korea Thawngzamh Pakhat Nih President Trump Cu Lih Chim Hmang Taktak Mi A Si An Ti

Korea ram I ramdang vuanci a tuanlio mi nih cun US President Trump cu “zeihmanh santlaih nak a ngei lo mi biakam nak a ser ve, lih chim hmang le mi hrokhrol taktak a si” tiah a chim. Hi kong a chim mi zong hi tulio US ramah a buai ngai mi minak pa thih nak kong ah fak ngai in a soisel zong a si.

Hi kong ah N. Korea ramdang vuanci nih a chim rih mi cu “America hi tuah khawh mi zeihmanh an ngei lo, lenglang zohnak in a thangcho mi sawhsawh bantuk ah kan ruah hna. An ram a buaiter tu hmanh an cawnpiak kho hna lo. President Trump zong hi santlaih nak a ngei lo” tiah a chim rih. A tulio ah N. Korea Supreme Leader a si mi Pu Kim hi zoh tikah President Trump he pehtlaih nak a ngei ti lo I zeihmanh ah a rel lem ti lo.

President Trump le Pu Kim pehtlaih nak tha an rak ngei lio khan tuak ah cun a tu hi kum 2 a si cang. Asinain American nih N. Korea caah thil tha le santlaih nak a ngei mi pawl kan ruah piak ko lai tiah biakam nak a rak ser mi cu nihin tiang, kum 2 chung ah hin a pelte hmanh a thahnem mi a um rih lo.

Cu ruang ah President Trump cu N. Korea ramdang vuanci a si mi Ri Son Gwon nih fak ngai in a soisel nak hi a si I hi thawngpang hi KCNA thawngzamh zung nih an chuah mi a si tiah theih a si. President Trump zong nih cun Singapore ah Pu Kim he an I ton lio ah biakam nak a rak ser mi vialte cu pakhat te hmanh tanglo in a philh dih ve hoi I N. Korea caah thil tha le santlai mi zeihmanh a tuah ve hoi lo.

Sourcr: D Nae Khit

 190 total views,  1 views today

This function has been disabled for Chin 11 News.