MP Ka Tlin Ahcun Mizapi He Naihniam Tein Rian Ka Ṭuan Lai I, An Ca Ah LIANGDAN ṬHA Ka Si Lai

MP Ka Tlin Ahcun

++++++++++++

1.  Kum khat chung MP thlahhlawh ka hmuh ding mi cu thimfung a ka petu mizapi caah a herhning in ka hman dih lai.

2. Mizapi he naihniam tein rian ka ṭuan lai i, an ca ah LIANGDAN ṬHA ka si lai.

3. Hmunhma, vawlei le ngunkhuai kong ah Chin miphun ca ah a ṭha mi le a fek mi phung ser le nunter kaa zuam lai. Kan pupa nih vawlei ngeihnak nawl an rak ngeih mi phung hna cu kan miphun ca ah a fek mi le a hmunmi phunghram ah telh kho ding in kaa hmaithlak lai.

4.. Ziknawh eihmuarnak cu fakpi in ka doh lai. Tender kong le cozah rian soknak kong ah ziknawh a um nakhnga lo kaa zuam lai. Cozah rian hi “Zuarchaw” bantuk ah an hman tiah an chim lengmang. Hi nih hin kan Khrihfa Biaknak le kan miphun mui a zawtter ngaingai. Kei nih cun mino hna nih chawva dih loin rian an luh khawhnak hnga le anmah an thiamnak hoih in rian an hmuh khawh nakhnga kaa zuam lai.

5. Sifah zorternak hi kaa hmaithlak bik lai. Chinram kan sifahnak cu rian a ngei lomi kan tam tuk caah a si. Chinram chung ah a ra lutmi ṭhanchonak hna zong hi kan miphun chung nakin Kawl company le rianṭuantu sinah a luang dih. Zei bantuk company an si hmanh ah Chin mizapi sin ah chawva a luan khawh nakhnga kaa zuam lai.

6. Cinthlaknak (Agriculture) lei in kan ram ah a chuak mi thilri hna hi nihin ah Ahran (kung-cian) dirhmun lawngin kan zuar khawh rih. Tahchunhnak ah Coffee, Tawlre ba tibantuk hna hi kung-chaw (finished product) tiang asiloah semi-finished product kan chuah khawh ahcun Chin mizapi nih tangka hmuhnak a let in a ngei ding mi kan si. Hihi biatak tein kaa zuam lai.

7. Zuatkhalhnak (Livestocks) lei ah, Sia hi hmun dang ram dang ah a um tuk lo mi a si. Eidin colh awk a ṭha mi (Ready Made) tiang in kan chuah khawh ahcun ramleng cu chim lo, Kawlram chung minung nuai 60 sin ah kan zuar khawh lai i hmuhnak tampi a ngei kho ding kan si. Mino chawkawlthiam (entrepreneurs) hna thazaang peknak in ka tawlrel lai.

8. Kawl company siseh, Lai company siseh, kan Chinram chung rianṭuantu rian an pek tikah Chin mino hna papek in rian an pek nakhnga policy tuah khawh kaa zuam lai. Bianabia ah Kawl minung pakhat rian pek tikah Chin miphun pahnih tal rian pek hmasat hrimhrim ding ti bantuk policy tuah khawh kaa zuam lai.

9. Nihin ah sianginn cu Primary in Middle school, Middle school in High School ah an pek thluahmah. A ṭha tuk mi a si. Asinain, saya/sayamah a za tawk in an kan pe ti lo. Atu Chinram ah a um mi sianginn dirhmun tein saya/mah tling tein kan ngeih cio khawh nakhnga kaa zuam lai. Cu hnu lawng ah kan fale zong ca an thiam lai. Khuate le khuapi sianginn karlak ah i dannak a um lai lo.

10. Ngandamnak lei in Chinram ah Doctor Specialists kan ngeih lo ruang ah Mandalay, Yangon, Kalay lei kan panh i, thi lo ding zong lampi ah kan nunnak a liam. Kan chawva tampi a dih. Chinram ah Sibawi Specialist kan ngeih khawh nakhnga kaa zuam lai.

11. Chin miphun cu Lothlo kan si. Ramlak ah rianhrang kan ṭuan. Khawndennak kan ton sual tikah i tlop zokzoknak (First Aid) zeihmanh kan ngei lo. Inn kip ah First Aid kuang kan i chiah khawh nakhnga kaa zuam lai. Cozah in siseh, NGOs hna he i bawm in tuah khawh tuk ding mi a si ko.

12. Chinram chung um lei cung, lei tang thil chuak siseh, cozah lei rianṭuannak in ṭhanchonak a phan mi siseh, Chin mi nih kan i hlawkpi nakhnga kaa zuam lai.

13. Kokek harnak kan ton ding mi ruang ah lungrethei in kan um nakhnga lo, runvennak le timhtuahnak kan ngeih khawh nakhnga kaa zuam lai. Keimah zong pawngkam lei kong he pehtlai in Master (M.Sc) tiang degree a la mi ka si tikah keimah pumpak hrimhrim teltum le tawlrel kaa zuam lai.

14. Kan Lai nunphung ni sunglawi hna phunghram in kilven khawh kaa zuam lai. Kan caholh, kan tuanbia, kan nunphung a si mi laam le celhzuamnak hna ṭhanchoter kaa zuam lai.

By Salai Van Chan Ceu (CNLD Candidate, Hakha Peng Pyine No. 1)

 283 total views,  2 views today

This function has been disabled for Chin 11 News.