Mizaw Thar Case 182 Kan Thlop Tti Rih Hna Lai: By Lal Pek Lian

Coronavirus zawtnak rungrul nih December 2019 in vawlei pi a kan zawtpi, mi tamtuk a kan zenpi. Ttih a nung, kan thin zong a phang ngai ko. Mi tamtuk nunnak a lak hna. WHO le bang nih cun hi zawtnak rungrul hi a lo kho ti lai lo a ti tik ah kan tha a hun a chia pah nain ruahchannak cu kan ngei ko. A ruang cu ngandamnak lei rianttuantu hna le mizapi kan i bawm hna i zawtnak kan thlopning, kan i runvenning a ttha kho chin ve lengmang i teinak tampi kan hmuh cang.

Khamnak sii (vaccine) zong Pathian nih a kan pek cang naklai thla camnak in zaangfah nawl peng ko hna usih. Flu timi tlangrai in minung tamtuk an rak thi lo, flu cu a lo thai kho ti lo nain sizung lei nih an kan thlop khawh ko. Covid-19 zong hi a rauh hlan ah fawi te in an kan thlop, an kan ven khawh te ko lai.

​Case 150 kan fanu zong voi hnih tiang negative a si cang i Hakha sizung in a ttum kho cang, zohfel in a um rih, a dam thai lai kan zumh. Atu Malaysia in a rak tlungmi Case 182, kan nau pa zong Pathian nih ngandamnak pe hram colh ko sawhseh! Thantlang khua an i venning, Thantlang sizung le Hakha sizung komh in an kan thlop piak lai i a rauh hlan ah result ttha kan hmuh khawh lai kan zumh. Pumpek le nunthap in hmaisuang ah mizaw a thlop tu sibawite, sayama te, le ngandamnak lei rianttuantu vialte hna nan cungah kan i lawm tuk.

Mizapi zong nih thlacamnak le a herhmi chawva thilri timhpinak, ei-din lei zohpinak lei in ttanpi rih hna usih. Mizaw thlop lio ahcun aho hmanh zai chiat siseh mu! Hi capar in zaangfah nawl kan duhmi hna cu kan naupa Case 182 a kong hi kan theih zong theih lo zong ah confidential timi zulhphung upatnak he veng ve hna usih. Media thawngzamhnak chungah mual kan pho lo ding a biapi tukmi a si.

 194 total views,  1 views today

This function has been disabled for Chin 11 News.