Mithmuhtu Pahnih Chimmi : Pu Nawl Tling Le Pu Tluang Cung Ti Ah An Paam Ning Kong Tawi

Catialtu: Salai Z T Lian

Pu Nawl Tling le Pu Tluang Cung ti ah an paam ning kong tawi

Nizan 6/6/2020 zanlei ah Pu Nawl Tling innchungkhar le ahawi pakhat tiin nga sio ding Lewisville ah an kal. Pu Nawl Tling nupi le fa 2 cu tidil kiang ah hmunhma lakin an idin. Pu Nawl Tling le a hawipa cu nga sio nak lei tidil ah an kal. Minute 30 hrawng nga an sio cuahmah lio ah Pu Tluang Cung le hawi an rak phan. Pu Tluang Cung le Pu Nawl Tling hi a rak ithei ciami an si. Nga zong zeimawzat an rak sio ti bal cang.

Tlawmpal an um hnu ah, an pahnih in tidil lai i a ummi thingkung cung in nga va sio dingin ti an tan pah, an ilio pah in an kal. Mah lio ah Pu Nawl Tling hi ti lionak a lai hrawng a phanh in ” Ka ba, ka lio kho ti lo” tiin a rak kir than, tlawmpal ah “ Ka chanh uh law” tiin a vun au. Mah lio ahcun Pu Tluang Cung cu thingkung pakhat a vai itlaih khawh cang, nain Pu Nawl Tling chanh dingin ti a rak ilio than.

Ti cungah voithum hrawng a lengah Pu Nawl Tling cu an vun chuah khawh. Ahnu ahcun Pu Tluang Cung nih a chanh khawh ti lo, a mah zong a cawl kho ti lo. “Hri ka chan uh” tiin voikhat cu a au. Cun tlawmpal ah ti chung ah a pil ve. Hri le fung tibantuk pakhat hmanh kan kiangah a um lo, cun ti lio zong kan thiam lo caah zeitihmanh in bawmh awk an tha lo. 911 sin bawmhnak hal colh dah ti lo a dang kan tuah khawh mi a um lo.Mah tiin an pahnih tein ti ah an kan paam tak ning cu asi tiin ti an tlak lio ahmutu pahnih nih an ka chimh.

Hi an tlaknak ti hi voidang zongah an rak tan, an rak ilio balnak asi ko tiin theih asi. Cun hi bantuk vanchiatnak an ton lio ah Laimi pahnih le Mexican 2 nih an hmuh hna tiin theih asi.

Pu Nawl Tling (Tikir) nih anupi le fale pahnih a roh ta hna, cun Pu Tluang Cung ( Farrawn-Hakha) zong nih anupi le fale pahnih a roh ta ve hna.

Pathian nih taantakmi chungkhar pawl le hawile pawl hnem hram ko hna seh.

(Note: Hi thihnak kong tial hi a fawi lo–lung a nuam lo taktak, nain thawngpang vaivun zong a um khawh caah mithmu pahnih hna i hnatlakpinak he hi thawngpang hi ka rak tial.)

 341 total views,  1 views today

This function has been disabled for Chin 11 News.