Mipi Khuaruahhar In A Tuah Tu NUG Acting President

National Unity Government (NUG) Acting President Duwa Lashi La hi mi nih theihmi a si lem lo. NUG nih Acting President rian an khinh hnu lawngah zapi zaran nih kan vun theihmi a si. Khin Nadi nih English in a ṭialmi Acting President of Myanmar’s Civilian Govt Wins Hearts of the People timi cabia chungin Duwa Lashi La a konglam le dohthlennak ah Acting President pakhat dirhmun nifatin rian a ṭuan ning tlawmpal ka vun char.

Duwa Lashi La cu kum 72 a si cang i Kachin miphun Khrihfa a si. A chuahkehnak cu Shan ramkulh Mung Ji khua a si i cuka ah cun sianginn cachim a rak ṭuan bal. Rangoon University ah upadi a cawng i sianginn a dih in kum 18 chung sihni le upadi bawi a ṭuan. English, Chinese, Burmese le Shan holh cu a nuhrin holh a simi Kachin holh bantukin a thiam i Kachin miphun chung i holhṭeng dangdang zong a thiam.

Fa 4 a ngei i kum 1990 thok khan ṭhanchonak, fimcawnnak, ngandamnak le zatlangrian phun tampi ah pumpek in a cawlcang i hruaitu pakhat zong a si. January, 2021 tiang kha Kachin ramkulh ah huham a ngei bikmi zatlangbu Kachin National Consultative Assembly ah Chairman a ṭuan. SAC nih nawlngeihnak an lak hnuah ramchung ramleng Kachin mifimthiam hna nih dirhmi Kachin Political Interim Coordination Team (KPICT) zongah Chairman a si fawn.

Nawlngeihnak lak hnu, a thla hnihnak April ah khan KPICT le CRPH cu tonnak an ngei i cu tonnak ah Duwa Lashi La cu Acting President rian an khinh.
Cu tonnak ah cun CRPH nih ramkomh minister (vuanci) caah minung pathum chuahpi u tiah KPICT cu an chimh hna. Cuticun cozah thar ser ding kong an i ceih. NLD cozah i Vice President Henry Van Ṭhio cu NUG cozah ah Vice President dingin an chuahpi.

Henry Van Ṭhio kongah KPICT chairman Duwa Lashi La nih “Anih (Henry Van Ṭhio) cu SAC nih NLD Cozah bawi dang hna he an tlaih i a inn ah an hren. Asinain taza an cuai lo. Kannih cu chantiluan thlen dingah khongton uknak a dohmi kan si caah SAC he aa naihniammi paoh cu cozah thar ah telh lo an ṭha bik. Thlennak a duhmi, democracy le federal tha a pemi lawng kan thim hna ah a ṭha deuh” tiah a chim. Cucu midang zong an lungtlin caah Henry Van Ṭhio cu NUG cozah ah an telh lonak a si.

CRPH nih cun Duwa Lashi La cu Vice President caah an chuahpi i KPICT palai dihlak nih an lungtlinpi. Duwa Lashi La nih cun a chungkhar cu phone in thawng a thanh hna i ralring le timhcia tein um dingah a chimh hna. Cu hnuah Vice President rian cu a cohlan. Cuticun Duwa Lashi La cu April 16, 2021 ah cozah thar NUG Vice President ah fehter a si. President U Win Myint cu SAC nih an tlaih caah Duwa Lashi La nih Acting President a tlaih.

Mi tampi an khuaruah a har tukmi pakhat cu NUG cozah rian vialte hi Duwa Lashi La nih ramchung in a tlangtlak khawhmi hi a si. Min Aung Hlaing hruaimi SAC nih thah an duh bikmi (most wanted) a si ko nain ramleng ah a zam lo, ramleng in Acting President rian a ṭuan lo. Ṭih a nung tukmi rian cu ramchung in a ṭuan. A chungkhar zong amah sinah an um. Acting President a si hnuah Shan ramkulh Lashio khuapi i a inn cu SAC ralkap nih an kalhnawh nain an um ti lo caah an kharpiak.

NUG Cozah office cu Myanmar ramchung hmun pakhat ah an chiah i cuka cun NUG Cozah rian le dohthlennak rian vialte cu a tlangtlak hna. A PS (personel secretary) nih “Kumkhat le cheu chung ah voikhatte hmanh a vuivai bal lo. A rian hi tlolh lo tein a ṭuan. Niruk le zarhpi zongah a herh ahcun din loin a ṭuan” tiah a chim.

Nifatin a rian hi zinglei 5:00am in a thok tawn. Kum 72 a tling cang nain rian thok hlanah pum cawlcanghnak (exercise) a tuah ta peng. Nikhat chung a rian ahhin cozah meeting kai, NUG tang i hriamtlaibu 300 renglo le tlangcung hriamtlaibu hna he tonnak tuah, ramleng palai hna he i ton le ramchung ramleng (Ukraine kong telh in) thawngpang rel hna an si.

Office ah rianṭuan lawng a si lo. Kahdohnak hmun tiangah a va kal i PDF hna he an i tong, an dirhmun le sining an chimmi kha ṭha tein a ngaihpiak hna. Chin ramkulh in CDF pakhat nih “President nih PDF a tonmi hna ka hmuh tikah kaa lunghmuih tuk. Kanmah umnak zongah a ra te lai tiah ruahchannak ka ngei” tiah a chim.

D-Day thanh in kumkhat tlinnak ah Duwa Lashi La nih cun PDF le tlangcung hriamtlaibu hna nih Myanmar ram zatuak 52% cu kan lak khawh cang tiah a chim. Special Advisory Council-Myanmar (SAC-M) hruaitu Miss Yanghee Lee nih cun “NUG cu zuamcawhtu cozah a si, ramleng ah a zammi cozah a si lo. Mipi dohthlennak aiawhtu a si. Ram chung hmun tam deuh a tlai khotu a si” tiah a chim ve.

Ram mipi nih a chia bikmi dirhmun an phak lioah SAC khongton uknak doh i hrawh dih dingin a ngan bikmi rian Acting President cu aa khinh i ramleng ah zam loin ramchung in dohthlennak rian vialte a tlangtlak. Ramdang cozah bawmhnak tel loin ramchung ramleng Myanmar mi hna bawmhnak tlawmpal tein NUG tang i rian vialte a ṭuan. Cucaah dohthlennak ralkap hna le ram mipi dihlak nih an upat, an ṭihzah i an dirkamh.

Salai CP Lian (CEO, The Chin Post)

Be the first to comment

Leave a Reply

Your email address will not be published.


*