Chin ramkulh Mindat khua pawng ah ralhrang phu hna nih an doh hna caah nizan August 13 ah CDF-Mindat he kaphnih kar kahdohnak a chuak.Nikhat chungah ralzaam dirhmun in minung 4000 tluk an zaam tiah CDF-Mindat lei thawngchimnak nawlngei tu pakhat nih a chim. Cun ralhrang phu hna nih khuachung mi hna cu a ruang um lo in an tlaih hna, paw-ta an suai hna tiah theih a si.
“Nizan meng 13 kahdohnak a chuak.Atu hi a deih lio a si nain, zeitik dah an thok than lai chim khawh a si lo. Anmah lei in phuhnih in khuachung tiang hmunhma lak in an doh. Voikhat nak dohnak ahcun ralzaam hi za renglo lawng an si.Voihnihnak ahcun Shiat khua pawng hrawng an zaam cio caah 4000 hrawng an si.Nizaan ah khuami minung 4 hrawng an tlaih hna , an thilri zong an phorh ter hna ,khua chung inn hna zong an hrawh” tiah CDF-Mindat in chimnak nawlngeitu nih a chim.
Nizaan kahdohnak a chuah ningcang hi Mindat khua nitlaklei Matupi ram lei lam ah ralhrang minung thazaang 100 hrawng in phukhat, Mindat khuachak lei Shiat khua le in phukhat tiah ramri lonh in an rat caah CDF-Mindat lei nih an mah an i vennak ah kaphnih kar kahdohnak a chuah hi a si.
Kahdohnak ah ralhrang phu lei in RPG hriamngan zong an hman.Kaphnih ah thih nak a um lo nain CDF-Mindat lei in minung 2 hliam an tuar, ralhrang phu lei thawng fiang theih a si rih lo.
Ralhrang phu hna nih Mindat khua cu ramri lonh in an doh hna leng ah ralzaam mipi hna caah eiding, sii-ai phorhnak motor lam pi cu an phih, cun khuachung inn le inn-ka hna cu hrawk in, ni fa tin inn chung thilri cu hramhram in an fir tiah khua mi hna nih an chim.#Mizzima
Leave a Reply