Nizaan (August 13) ah a cangmi Matupi-Mindat karlak kahdohnak ah CDF-Mindat in minung 2 hliamhma an pu, tiah thawng kan theih. August 13 zaanlei ah Matupi-Mindat karlak meng 13 ah SAC ralhrang pawl an rak phak caah kahdohnak a chuak tthan.
“Meng 13 zawn ah i kahnak a chuak. Anmah SAC ralkap pawl hmai ah an rak nor chin lengmang caah kan i kap. Kanmah lei in minung 2 hliamhma an pu nain an hliamhma a fak lo,” tiah CDF-Mindat chungtel pakhat nih a chim.
CDF-Mindat le SAC karlak ceihmainak a tlamtling lo hnu, July 16 thawk in kahdohnak a rak chuak tthan. July 30 kahdohnak ah SAC ralbawi Lt. Col. Zaw Zaw Soe a thi i, cu caan thawk cun Mindat lei ah ralkap thazaang tam chinchin in an chap.
Nihin (August 14) zong ah SAC nih hmun hnih in ralkap thazaang an chap tthan. “Bu hnih in nihin ah ralkap thazaang an chap tthan i, bu khat hi Matupi-Mindat karlak meng 14 ah an phan. A dang bu khat hi Pinglawng khua ah an um. Ral lei cawlcanghnak an thawk ahcun kahdohnak a chuak tthan ko lai,” tiah a cunglei CDF chungtel nih a chim. The Chin Journal
Leave a Reply