Min Aung Hlaing SAC Ralhrang Nih Kan Sakhaan Nan Lak Mi Kan Pe Than Uh An Ti Hna

KNU/KNLA nih a lak cang mi ralhrangbu sakhan in KNLA brigade 6 nih a lak mi sakhan 2 hna cu ralhrangbu nih pek than dingin a hal tiah theih a si. Hi sakhan 2 hna hi Karen ramkulh Kyarinseikkyi peng Khokkhua tlangah a ummi Kalikhi sakhan le Kawkareik pengah a um mi Ceik camp hna an si.

Kalikhi camp hi KNLA brigade 6 kuttang battalion (17) nih August 26 ah kah lo in an lak mi a si i, Ceik camp zong ralhrangbu nih August 21 ah an chuahtak ruangah KNLA battalion 18 nih an lak mi a si.

Sakhan an hal mi lakah Kalikhi sakhan cu KNU nih nai ah khan an pek than cang tiah theih a si i, Ceik sakhan kong cu kaphnih tuanvo ngeitu hna an i chawnh lio a si tiah KNU hruaitu pakhat nih a chim.

Kalikhi sakhan hi KNU nih NCA min a thut hlan 2015 October hlan in ralhrangbu nih an um nak sakhan a si i, mipi tamnak khua pawngah a um mi a si ruangah kan pek than mi a si.

Ceik sakhan belte cu khuami hna zong nih ralhrangbu pawl an um than lai an phang, an duh lo ruangah kan pek than hna le pek than lo ding a fiang rih lo. Kan ceih lio a si tiah KNU hruaitu nih an chim.

Ralhrangbu le BGF 100 hrawng cu Ceik khua pawng Kunkalei khua phungki inn ah umhmun an khuar lio a si tiah KNU sin in theih a si.Atu hrawngah ralhrangbu nih KNU/KNLA doh dingin BGF he fonh in thazaang tampi an i chap tiah theih a si i, KNLA brigade 5 commander Brig. Saw Mu He nih brigade 5 cu ralhrangbu nih lak dingin an timh tiah Salween press biahalnak ah a chim.Ref; Irrawaddy;TCP