Min Aung Hlaing Ralkap Pawl Nih Tatmadaw (Ralkap Ni) Hman Ngam Dawh A Si Ti Lo!

March 27. 2021 A voi 76 nak Kawl ralkap Tatmadaw ni a si, i kum dang ah cun mah ni ahhin ralkap thazang langhter in puai an tuah tawnmi a si. Tu kum zong hlunghlai taktak in tuah ding timhtuahnak an rak ngei ko nain hmanthlak chung bantuk hin Tatmadaw hruaitu nih an i leet chung kong a van thanh cang.

Ralkap nih uknak an laak tthan hnu ah rammi nih an duh hna loning fakpi in an langhter i Hriamtlai phu cheukhat zong nih kahdaihnak an hrawh i ralkap thazang an i hrim hna tiah bia a chuak.

Cu pinah mah Tatmadaw ni ahhin ralkap sin in uknak laak tthan ding KNU, KIA/O le Shan ralkap an i tim tiah bia a chuak. Zei ruang set ah an leet ti theih a si lo nain ram a buai tuk lio a si caah le an ruahning tluk in mipi an tei hna lo caah a si tiah Facebook cahmai ah an langhter ngai. Credit: Daily Chin News

Thawngpang dang: Ruah lengmang ah lung a fak hringhran ko mu, sui khualipi timi khuadawh le khua nuam tak tak, miphun kip an i cawh i an hna a ngam tuk tawn nak khuapi Mandalay cu atu ahcun ningtti in a um cang. Thisen luannak le ralhmun ah aa chuah ko cang.

Nizan March ni 21 zan ah khan Mandalay khuachung bak ah mipi cu ralkap nih machine gun timi hi duh tawk bak in an kah hna caah hngakchia pa pakhat nunnak a liam. A thimi pa hi mino te a si, a lu ah meithal kuan nih a khen caah a nunnak a liam tiah an chim.

Hi hmun hi Mandalay Chan Aye Tha San peng lam number 30, 31 le 89 lam kar ah a si, ralkap nih khuachung mipi cu an duhpoah in zawndomh bak in heh an kah hna ti a si. Cu ahcun Cafe dawr i rianttuanmi mino te cu a lu ah meithal kuan nih a khen i a nunnak a liam tiah pawngkam ummi, ralkap nih an kah hna lio caan ummi hna nih an chim.