SAC Ralkap Nih Kum Khat Chungah Inn 40,000 Leng An Khangh Cang
=======================
A luacia 2022 kum chungah SAC ralkap nih ramchung mi inn 40,000 leng an khangh cang, tiah NUG nih cathanh an chuah.
Tualchung mi hna nih an chim ning le media hna nih an langhtermi cherhchan in kan khawmhsuat mi a si i hi nak in SAC ralkap nih inn an khangh mi a tam deuh kho, tiah NUG meithat phu nih an langhter.
SAC ralkap nih inn an khangh mi chungah Sagaing ramṭhen in inn 30,100 leng a si i, ramkomh kawlram chungah inn kaang a tam biknak a si, tiah theih a si.
Ram chungah SAC ralkap nih an khangh mi hmanthlak le muicawl cu tualchung mi hna nih an langhter ko nain kanmah nih kan khangh mi a si lo tiah SAC ralkap nih an i pheh.
Ramkhel ngiathlaitu hna nih an chim ning ah SAC ralkap nih an uk pen khawh mi khua le hmun paoh cu hrawh le khanghnak phung(scorched-earth policy) an hman i inn le lo cu an khangh, tiah an chim.
Relchap>>>>Matupi SAC Ralkap Camp Chung Ah Nu Pakhat Thilak In An Hrem,Thla 6 Hnu Lawng Ah Chungkhar Nih An Theih
======================
Chinland, Matupi khuapi hrambunh SAC ralkap camp in ralkap 2 hna cu Meithal zuun 3 he 2022,April 21 ah CDF- Mindat sin ah an rak tli.
SAC ralkap 2 an zam a thaizing ah Matupi khuami nu 6 tel in minung 7 cu SAC ralkap nih an rak tlaih hna i an camp ah an kalpi hna hnu ah a tlizam mi ralkap 2 nan bawmhchanh hna tiah an hrem hna, Cu hna lak ahcun Matupi khua um mi Vankai khuami kum 30 tluk upa Nu Dezin zong ai tel ve tiah theih asi.
Dezin an tlaihnak thla 6 a rauh tiang ah chungkhar he tonnak nawl an pe duh hna lo i khoika an chiah ti zong an chim duh hna lo,Kan hnu naite ceo ah Dezin a chungkhar hna nih rianngeitu upa hna an hal tik hna ah nikum june thla ahkhan an hremnak ah a thi cang tiah an chimh hna, Nu Dezin a thi cang tinak catlap zong tutan i thilfiang an hngalh hnu lawng ah biaceih zung nih a chuah piak hna tiah theih asi.
Nu Dezin he an tlaih ți mi pa pakhat zong a tutiang chungkhar nih an tong kholo i khoika an chiah? a thi maw a nung? ti hngalh a si lo.
Chinland ram Matupi khua hrambunh ralkap camp ah mizapi 2 an thah cang hna, 2022 December thla ah Phanai khua mi pakhat an rak thah bal cang.
Leave a Reply