Min Aung Hlaing Khi Ngarawl Bantukin Rilipi Ah An Thlak Khawh Men Te!

Kawl miphun hi mirang le Japan pawl hmanh nih uk an rak iharh ngai hna timi kong an rak chimmi ka theih bal. Tutan Kawlram buainak ahhin Kawl ralkap le ralkap lila aanathein a chuah kho men tiin ka ruah. Senior General Min Aung Hlaing khi ngarawl bantukin rilipi ah an thlak khawh men te.

Thawng lio caan, huham ngeih lio caan ahcun ” Ka bawipa, ka sayapa/sayanu” ti a thiam bik miphun an si bantukin a thawngnak a dih cang, a huham ngeihnak a dih cang ti ahcun “nga-lu-ma-ta” ti a chim a fawih bikmi miphun zong an si khi philh awk a tha lo.

Mirang bia ah a ummi cu tuanbia hi a nolh than tawn ti asi. General Ne Win le afa/tu le pawl cu a mah hnuzul a rak simi Than Shwe nih a rak tlaih bal hna. Cu bangin Min Aung Hlaing zong hi a zultu pawl nih a hnulei an chih tak hrim lai lo ti chim chung ding ahcun a tuan deuh rih.

Theih Hrimhrim Ding: Social punishment timi hi iralrin thiam a hau ngai. Mitha zong kha nek a ngeimi nih mah pa hi palik thawngpang a petu asi a ti khawh, cun Kawl ralkap minung zong nih pakhat le pakhat buai hna seh tiin thawngpang deu kha a tak bantukin mihlennak caah a hman khawh.

Tehte zong um bak loin facebook ah a hmanthlak tar in le catlang pakhat tialmi tar in melmang a thuh khawh. Tikah iralrin thiam ngai a hau hlei pin ah rang tukin le tha tein hlethlainak tuah tak loin post mi poah i siar (share) lo ding hi a biapi kho.

A muihnak ram ahcun ruahdamh thawngpang le bia vaivuan a tam khun. Abikin ralkap minung an lalnak le fimthiamnak a niam tuk nak Kawlram bantuk ah a zual khun. Laknak: Salai Z T Lian