Mibu Phaisa Cu Fir Khawh A Si Lo, Vaurawng le Olivia Nu Cinzah Tibantuk Tu Nih Khi An Duh Zah An Fir Kho

Mibu Phaisa Cu Fir Khawh A Si Lo, Vaurawng le Olivia Nu Cinzah Tibantuk Tu Nih Khi An Duh Zah An Fir Kho

CBCUSA le Chinland Club tbk khi cu bu nganpi an si caah minung pakhat or team pakhat nih mah duh in phaisa an fir kho lo — cazin checktu an um zungzal. Nain, Olivia Nu Cinzah le Vaurawng tbk khi cu private an si caah thlachiat an ruah lo sual ahcun an duhzat an fir khawh.

Aho hmanh nih an cazin va check khawh asi lo, check phung zong a si lo — pumpak private an si caah anmah kut ah nawlngeihnak 100% a um.

Tuni tiang ahcun Laimi nih an fel ko tiah kan zumh hna caah an sin ah phaisa tampi nan thawh ngam khi a si. Anmah tlangtlaknak thawng in Laimi nih thahnemnak kan ngahmi chim cawk lo asi, an fel ahcun hmailei zong ah miphun ca thahnemnak tampi an chuahpi rih fawn lai.

Minung nih an kan hmuh lo zong ah Pathian nih a kan hmu ko timi lungput he fel tein mizapi phaisa an tawlrel zungzal nak hnga thlacam tu bawmh lengmang ko hna u sih.Crd… Lung Thli Tum

Relchap>>>>>>Ralhrang Rual Nih Tuksapur In Mipi Thah Nawnnak An Tuah Ee, Minung 10 Leng Ralpaw An Hman Mi Hna An Thah Cang Hna

Magway ramṭhen, Myaing peng Magyikan khua ah SAC ralkap cu April 18 ah an lut i, sii aa thlop liomi mino 10 nak tlawm lo an thah hna pinah, tualchung mi 30 leng ralphaw hman ding ah an tlaih hna, tiah PDF nih an chim.

April 18, zing suimilam 11:00 hrawng ah SAC ralkap nih Magyikan khua cu Mi35 Helicopter pakhat in an kah pin ah, Mi17 Helicopter 2 nih ralkap an thlak hna i sii-inn ah sii aa thlopmi tarnu tarpa hna zong an tlaih hna. Sii aa thlop liomi a zaammi mino 10 nak tlawm lo zong an thah hna, tiah theih a si.

“SAC ralkap nih an thahmi hna chung ah kum 17 tluk tangkua siangngakchiapa ruak pakhat kan hmuh. Sii vialte zong an khangh dih. Mizaw khuaihlainak khaan zong an hrawh pin ah sii-inn hmai inn 4 zong a kang,” tiah PDF nih an chim.

SAC ralkap nih Magyikan khua cu vanlawng in an kah hnu ah sii-inn chung a ummi mizaw mino 10 hrawng an thah hna. Cheukhat cu an zaam i lamhlatpi a zaam kho lomi hna zong an thah hna. Thah a tongmi chung ah mizaw congtu hna zong an i tel, tiah theih a si.

SAC ralkap nih tualchung mi 30 tluk an tlaih hna caah hmunkhat ah an chiah hna i, an hrem hna. Magyikan khua ah SAC ralkap an um rih caah thawngpang fiang tein theih khawh a si rih lo, tiah theih a si. SAC nih cathanh an chuahmi ah cun pa 10 le nu 20 cu PDF he pehtlaihnak a ngei khomi an si caah ralkap nih an tlaih hna, tiah an thanh.Crd.. TCP