Mi Thilri Chuh Ah SAC Ralhrang An Vak Hoi Ee, An Hmuh Mi Hna Cu An Chuh Hna

Cawbuk Check Gate Ummi SAC Ralkap Nih Tualchung Mi Thilri Hramhram In An Chuh Hna
============================
Chin ramkulh, Hakha khuapi Cawbuk sang checkgate hngaktu SAC ralkap nih, khualtlawngmi hna thilri cu hramhram in an chuh hna, tiah theih a si.
Khualtlawng mi pakhat nih, “Khuasik thla a si bantukin mei lo cun a si khawh lo caah December 28 meihol tun khat ka va phorh i Cawbuk sang um checkgate hngaktu SAC ralkap nih tlawmpal a kan lakpiak,” tiah a chim.

Meihol cu pum pawcawmnak ca zong ah kan hman i kan zuar. Meihol tun khat ah kyats 13,000-15,000 kar a si i man a ngei tuk. Hi bantukin mi thilri an kan lakpiak hi cu a poi ngaingai, tiah a chim chap.
Nizaan, January 5 ah SAC ralkap nih meihol a phormi hna cu tun khat an lakpiak hna, tiah theih a si.

Cu kong he pehtlai in tualchung mi pakhat nih, “Meihol an cawkmi cu Cawbuk sang um check gate hngaktu SAC ralkap nih tun khat an lakpiak hna. La hlah u ti zong in ti ngam an si lo, khuasik thla a si ruangah meitoh awk an ngei lo i atu bantukin an lakpiak hna hi a si,” tiah a chim.

Relchap>>>SAC Ralkap Nih Bingka Khua An Khangh
=========================
Sagaing ramțhen,Salingyi khuapi chaklei mengkhat tluk a hlatnak ah a ummi Bingka khua cu nihin January 6 zing slm 9:00 ah SAC ralkap nih an khangh tiah theih a si.

” SAC ralkap 100 hrawng zahan zaan ah kan khua an phan i zaan lai ah hriamngan an kah, zingka ah khua cu duah hram an thok i mei alh cu a hlio in ai hlio ko, kan khua cung cu meikhu nak pipi in a khah ko khi a lang hlat in kan hei cuanh, mah khua mah inn a kangh lio a lang hlat te lawng in zoh cu ka lungfah ka celh lo ” tiah Bingka khua mi nu pakhat nih a chim.

SAC ralkap nih Salingyi peng ah rallam an sial caah Kyauhmaw, Paing Taunggyi, Mae Zaligan,Htanpuh,Htanzin,Bingka, Phaungkata, NatKyun,Natset,Tekawgyi le Waikway khua in minung 8,500 hrawng ral an zaam.