Malaysia PM Hlun A Si Mi Dr. Mahathir Azaw Ve Cang Rua

Malaysia zong Covid-19 nih tilian bang avun phanh ve hna cang i Dr. Mahathir zong atuhi ngeih dawh asi caah a inn ah an um ter ve. Naite ah khan Sarawak MP Dr. Kelvin Yii he an i tong i Dr. Kelvin Yii kha Covid-19 angeimi arak si caah Dr. Mahathir hi achonh cang ko lai tiah thlopbul hau (Quarantined) ah an chiah ve. Dr. Kelvin Yii zong cu March 15 ah khan amah hawi MP asi vemi MP Andrew Wong nih achonh mi asi ve.

Malaysia Cozah Buainak

Malaysia cu tulio hi Pakatan Party cozah kha anmah chung lila in an kuai i akuaimi phu le hlanlio Najib party asimi UMNO (BN party) kha an i fonh i cozah an dir lio asi. Dr. Mahathir cu hlanlio tein ami zumh cem arak simi le Bersatu Party zong adirh pimi Muhyiddin Yassin nih akal tak i Perikatan Nasional Coalition timi an va dirh. Perikatan nihcun MP tampi (UMNO, MCA, PAS pin ah Sarawak, Sabah MPs pawl) an i sawm khawh hna caah cozah an tling i atuhi Muhyiddin Yassin cu Malaysia Prime Minister asi.

Malaysia ram hi Muslim ram (Islamic State) ah kan ser lai atimi PAS party zong an vai rawih rih hna caah Pakatan Party cu an thlak khawh colh hna. An buaining hi cauk in țial hau asi. Dr. Mahathir cu kum 95 asi cang i tutan hi Covid-19 in azawt tak ahcun ader thawm ter tuk lai caah adir kho țhan te hnga dek maw? Tulio cu Dr. Mahathir caah cun ami zumh cem pawl nih an kal tak i alungfah tuk lio ah Covid-19 nih avun tuaitam rih cu a ingpuan azual ngai men lai dah. Dr. Mahathir nih June thla ah hin Muhyiddin Yassin he party chairman kan i cuh lai tiah achim cang i atei ahcun Mahathir hi rak kir khawhnak lam angei. Asinain Covid ruang ah hin zungkhar le meeting khar, parliament ngol chung ti bantuk aum len rih te țheo lai. Mahathir lei ahcun amah dirhmi Bersatu party cheukhat le Anwar hruaimi le DAP pawl an taang.

2018 ah Pakatan Party nih an thlaak mi Najib Tun Razak cu tutan ah hin anaupa (cousin brother) asimi Hishamuddin Hussein zong cozah an tlin țhan caah Foreign Minister an pek colh. Najib cu amah chan lio ah DPM arak țuan piaktu Zahid Hamidi he taza an cuai lio hna asinain an luat te men lai ti zumh aum ngai. Tutan Malaysia politics an i phomh dan hi khuaruah har asi. Politics khel athiam tuk mi minung 3 zong an lang. Cun miphun thleidannak (Racism) le politics chung ah i zumh lo (Distrust) afah tuk zia zong alang dih. Tutan cu Dr. Mahathir zong kum upat lei ahung panh hnucun politics ah hlanlio bantuk in athekvak ațha kho ti lo ti zong ahung langh ngai pin ah Anwar Ibrahim hrim hrim zong apalh ngai nak alang len ve. Perikatan Nasional Party le an cabinet thar umtuning ka vun țial te lai. Sau nawn pi țial hau khi asi.

Ka lawm.

Credit: Victor Khen Sang
March 19, 2020

 

 184 total views,  2 views today

This function has been disabled for Chin 11 News.