Malaysia Chin Unau Caah A Herh Ngai Mi: Tulio Malaysia Chinmi Kan Dirhmun

Malaysia hi COVID – 19 in a zawmi a zor lei an panh ziahmah ko cang. Nikhat hnu nikhat in a zaw tharmi an hmuh mi hna a tlawm deuhdeuh ko cang. Sihmanhsehlaw zawtnak hi a thian taktak lo ruang ah zapi i but cu cozah nih a kham peng rih.

Malaysia ah rian a tuanmi tete an um pah cang ko nain minung tlawmpal te lawng an si. Zapi tam deuh cu riantan loin um cio a si ko rih. Riantuan ngam a si rih lo pin ah rian a um lo. Rawldawr ah siseh, thil zuarnak dawr ah siseh, factory ah siseh rian thil a cawtu an tlawm tuk caah riantuan ding a tam kho lo. Cu ruang ah zapi cu riantuan loin um cio a si ko rih. Rian hi tukum chung cu a har kho men tiah zumh cio a si.

A poi tukmi cu zawtnak an hmuhnak hmun poh palik nih luh hnawh le hlathlai a simi hi kannih Chinmi caah cun a poi ngaimi a si. Minung pakhat sinah zawtnak an hmuh sual ahcun an inn chungkhar le innpa chakthlang pin ah a mah he ai naihniam mi poh kha kawlhawl an si tikah cucu a poi taktak mi a si. Kannih Chinmi hi UNHCR Card a ngei lomi tampi kan um caah a poi biknak a si.

Ho poh nih palik tlaihnak cun tlaih lo kha duh deuh ciomi a si. Cu ruang ah mahhi zawtnak kan ngeih i tuanvo ngeitu nih an kan theih sual ahcun kan chungkhar, kan innpa, kan sang chung tiang ca hmanh ah khin a poi mi a si cang. A ruang cu a cung lei kan chim cang bang in UNHCR card a ngei lomi tampi kan um caah palik nih tlaih ahcun thong tlak ding khi a si ko hnga.

Malaysia ahhin Chinmi umnak sang zeimaw ahcun NGO lei in bawmhnak tete a um pah nain zeimaw sang ahcun bawmhnak a um lonak zong a um ve fawn. UNHCR lei nih tangka in bawmhnak zeihmanh an kan pekmi a um lo. Hi vialte ralzam harnak kan ton ahhin an kan bawm kho bak lo tinak a si ko.

Malaysia ah a ummi Chinmi hna zei thil kan ton poh ah lungrethei tuk in um hna hlah uish. Kannih cu a nungmi Pathian fa kan si ti thei in kan tonmi harnak hi a tuar zia tu thiam i zuam ko hna uish. Bawipa nih zei poh hi a khan te ko lai tiin ruat ko hna usih. Tlaihkhih kan ton sual a si zong ah kan upa te hna sin ah a rannak in theihter khawh i zuam hna usih. A herh tuk lem lo ahcun leng ah chuahvah lo tein um ko rih hna usih.

Source: Malaysia Chinmi Authawng

 160 total views,  1 views today

This function has been disabled for Chin 11 News.