Malaysia Chin Ralzam Sinah Theih Ding Le Ralrin Ding Kong A Biapi Taktak Mi Thawngthanh Nak

Hawikom dawt vialte hna nan umnak hmun cio ah dam in nan um cio hna lai tiah zumhnak kan nei. Kan theih cio bang Covid-19 pulrai ruangah Malaysia Chin ralzaam kan dirhmun cu lungrethei peng kan si ko.

March 18 thok in a tu tiang kal um sumrehnak (movement control order) le lockdown cu tuah peng asi. Malaysia ram chung ah zawtnak a thian khawh taktak rih lo caah kal um sumrehnak (MCO) cu December 31 tiang sauh than asi. Cucaah zalong tein lengchuah le vahvaih khawh asi rih lai lo tinak asi.

Hi caan ahhin kan nih ralzaam asimi hna zong nih Cozah nih zulh ding le tuah ding a timi kha zulh khawh le tuah khawh i zuam hram hna uhsih.

Kan theih cio bang Covid pulrai ruangah an mah Malaysia rammi zong rian lo le khai lo in an um i harnak tampi an tong ve. Cutikah ramdingmi huatnak le thleidannak a chuak. Kan mah Chinmi ralzaam hna zong daithlan ruang le nawlngaih lo ruangah tlaih le thongthlak kan tong lengmang. A tu ahcun UN card nei lomi tlaihkhih ton ahcun UN nih chuah le bawmh um ti lo.

Mibu umnak le zapi tonnak hmunhma hi cu a si khawh chung in kal lo le hrial khawh i zuam hram ko hna uhsih. Cun kan mah kan umnak inn le sang cio zong ah mibu thutti le kal um ti zong hi i ralring ko hna uhsih. Hmaihuh le kut tawl, thianhhlimh daithlang hna hlah uhsih.

Zarhpi ni pumh kong zong ah siseh UNHCR lei hmurka hi hngak ko hna uhsih. An mah Malay rammi Khrihfa pawl hmanh hlan bantuk in zalong tein an i pum kho rih lo. Zulh ding phungphai (Standard Operating Procedure) ning in tuah le um a hau. Cucaah lungsau thinfual te le ralring te tu in um rih ko hna uhsih.

A hlei in ralrin pek kan duhmi hna cu Kawl dawr le Karaoke dawr tibantuk ah kal lo i zuam hram hna uhsih. Cun kan riantuannak hmun le tuanmi rian zong hi a himmi si maw si lo ti zong zoh thiam ngai a hau. Ralrin hi kan caah himnak le luatnak bik asi ti kha philh hna hlah uhsih.

Laknak: Chin Refugee Committee, Malaysia

 128 total views,  2 views today

This function has been disabled for Chin 11 News.