Malaysia ah thi mi Leng Sui Hlei Tial a ruak kong an tawlrel ning he pehtlaiin Chin mipi lungfahnak.

Malaysia ah thi mi Leng Sui Hlei Tial a ruak kong an tawlrel ning he pehtlaiin Chin mipi lungfahnak.
==============================================

September thla 29, Malaysia ah a nunnak a liam mi Leng Sui Hlei Tial a ruak cu chuah semnak khua ram lei ah ning cang tein rak tlun pi asi. October thla ni 4 ah khan chuah semnak hmun ah rak phanh pi asi. Sihmanhsehlaw Thantlang khua cozah uknak lei ṭuanvo ngeitu pawl nih Thantlang khua thlan hmun ah ruak vuainak nawl an khamh hna leng ah minung pa 4 lawng nih asi cang nak in ruak vui ding in chimrel le tuah ter asi. Cubantuk thil ning cang lo khuakhan nak ruang ah Leng Sui Hlei Tial a ruak cu Chin miphun nunphung le zatlang he aa kalh in ruak fim asi. Cu kong he pehtlai in Chin mipi zapi nih tantak mi chungkhar caah ngeihchiat pi nak lawng si lo in Chin miphun nunphung le sining lo in ruak fim ter ton mi kong zong ah Chin mipi thinlung a kekkuai ter. Cu he pehtlai zong in Chin mipi nih Social Media in siseh, phumpak teltumnak le chimrelnak in siseh, a bu in siseh duhlonak le lungtling lo nak langhter lawng si lo in miphun phung le lam he ning cang tein ruak vui ding biatak tein dirpi le au pi asi caah Leng Sui Hlei Tial ruak cu a thaizing ah ning cang tein phum ṭhan asi. Hi bantuk thil dawhcah lo a cang mi he pehtlai in lungtling lo nak ca thanh zeimawzat le chim relnak zong tam lak te theih asi.

Hi kong he pehtlai in CHRO, Executive Director Salai Bawi Lian Mang nih cun “Malaysia ram ah a nunnak a liam mi kan farnu a ruak cu hika hmun tiang rak tlung pi asi nain a phunglam ning tein thlan hmun ah vui tinh mi he pehtlai in ṭuavo ngietu pawl nih khenkhamnak an tuah mi hi cu tlukrualnak a um lo mi tuahser nak asi. Atu bantuk ruak cu khua chung ah luh ter siang lo in lam kap ah hei vui ter sawhsawh men timi hi minung thinlung keng lo in dawhcah lo thil ngai asi. COVID-19 zawtnak thli hran a fak lio caan va si ko hmanh seh law hi bantuk thil hi cu zeitin hmanh in cohlan piak awk a ṭha mi thil asi lo. Hihnu hmailei ah atu bantuk thil a cang ti lo ding in ṭuanvo ngeitu pawl cung ah a herh mi sualphawt nak le liam ter nak tuah a herh. Atu thil sining nih kan ram sining ah caan saupi a hram aa bunh cang mi miphun le zatlang nun he pehtlai in harsatnak pawl zeimawzat a hun langhter chin” tiah ati.

Note: Chin Human Rights Organization & Chin World