Lungrual Hi Teinak Hmuh Nak Lampi Cu A Si Ko

Lungrualnak In Teinak Ah
===================
SAC ralkap cu nawlpeknak pakhat tang i an um caah lung i rual lo bu zongin an i funtom kho. Chinram dohthlennak ralkap hna hi nawlpeknak pakhat tangah kan um khawh lo caah i lungrual kan herh tuk. Nawlpeknak pakhat tangah um cu ahopaoh nih kan duhmi a si nain atu kan dirhmun ah cun a si kho lomi a si.
Asinain thachiat ding a si lo. A ruang cu nawlpeknak pakhat tangah um lo bu zongin kan hmuitinh ah lung i rual khawh a si ko.


Mirang phungthluk ah “Maimomh hmanh nih an i lungrual ahcun Chiandeih zong an hren khawh (When spiders unite, they can tie down a lion)” ti a um. Dohthlennak ralkap hna kan i lungrual ahcun kan thiamnak le hriamnam hme hmanh seh law uknak ṭhalo hi kan tei khawh ko.

Lungrual timi cu ruahnak le hmuhning i khah viar khi a si lem lo, hmuhning le ruahnak i dan buin rianṭuanṭi khawh hi LUNGRUAL cu a si.
Chinram ah pengtlang hoih in hriamtlai kan um cio i kan ruahnak le hmuhning aa dang liangluang ko lai. Asinain thil pakhat ah surlu bang kan i funtom dih ko. Cucu uknak ṭhalo tei a si. Zeiruangah dah tangka kan thawh? Zeiruangah dah hriam kan tlaih? Cucu kan i fian cio mi a si.


Atu i kan dirhmun cu kan Laiholh i “Thlan kam ah dir/thih ri le nun ri ah um” timi kha a si. Thlan kam ah kan dir bu hmanh in kan i lungrual khawh lo ahcun Chin miphun nih kan ca le holh chungin LUNGRUALNAK timi biafang hi kan hlonh a hau hnga!

Nihin ah cun uknak ṭhalo tei ding hi i hmaithlak cio ko usih. A tei hmanh kan tei hlan ah tei hnu i covo le umdan ding kong ruah len a hau lo. Uknak ṭhalo hi kan tei hmasa a hau. Kan tei hnuah a simi paoh si te ko seh.
Kanmah le kanmah kan i doh zong a si kho, kan tei hlan nakin kan buai deuh zong a si kho. Asinain cucu a si rih lomi an si, a si khomi lawng a si. Atu i kan ton cuahmah mi le a tak in a cang cuahmah mi tu hi i hmaithlak phot ko usih. Kawl nih “A hnu i buainak cu a hnuah tuahremh ding a si (နောက်ပြသနာ နောက်မှရှင်း)” an ti bantukin kan tei hnuah a cangmi cu kan tei hnuah tuahremh ding a si ko lai.

A cang cuahmah mi hmanh kan tuahremh khawh rih lo lioah a cang rih lomi kong i kan buai ahcun zeitindah lohma a kal khawh hnga! Hmailei ca cu ruah phung, tuaktan phung a si, asinain thaizing ca na ruah tuknak ah nihin na rian tlolh ding a si lo.

BC chan lio i Latin caṭialthiam Publilius Syrus nih “Lungrualnak a umnak paoh ah teinak a um zungzal (Where there is unity there is always victory)” tiah a rak chim. American ramkhel thiamsang Thomas Paine zong nih “Milu zat ah si loin kan lungrualnak ah kan ṭhawnnak cu a um (It is not in numbers, but in unity, that our great strength lies)” tiah a chim ve.

Lungrualnak kong cu tampi chim len a hau lo, a ṭhatnak kan theih dih. A ṭhatnak kan theih cio ko caah a tak in i rual cang usih. Hmailei ah zeidah kan lawh lai ti chim khawh a si lo. A zungzal in lungrual khawh zong a si fawn lo. Asinain tutan khuapau dohthlennak ah kan lung aa rual ahcun kan miphun tuanbia aa thleng hrimhrim lai ti tu cu ka chim ngam.
Salai CP Lian
CEO, The Chin Post

Relchap>>>>>SAC Nih Camp Victoria Kap Hna Seh Law
========================
SAC nih Camp Victoria hi an kap taktak lai lo tiah a chimmi an um. Cheukhat nih cun a kah te ko lai tiah an zumh ve. Keimah pumpak pumpak zong nih an kah te lai ti hi ka zumh, a tuan le a tlai tu cu chim awk a ṭha hnga lo!
An kap lai lo ti an zumhnak a ruang pahnih a um. Pakhatnak, Camp Victoria ah dohthlennak ralkap lawng an um lo, mi sawhsawh tampi an um. Cun Camp kiangkap ah khua an tampi. Pahnihnak, Camp Victoria cu Myanmar-India ramri ah ummi a si i cunglei in bomb thlak ahcun India ramchungah a tla kho. A tlak ahcun India cozah he an i mithmai chiat kho.

Asinain SAC nih hriamtlai le tlailo an thleidang lo. Camp ah mi sawhsawh tampi an ummi le a kiangkap ah khua zeimawzat a um ruangah SAC nih Camp Victoria kah an timhmi an i leet (ṭhulh) lai lo. Cun India ramhcung i an bomb (a ningin a si kho i a pelpawi zong a si kho) tlak ding zong an ṭih lai lo.
Myanmar ramkhel thiamsang U Than Soe Naing nih “CNF nih hmunpi (headquarter) cu an ngei ko nain a dang tein a si lo. Mi sawhsawh khua hna lakah a ummi a si. Cucaah CNF hmunpi khi bomb thlak hnawh hna seh law tambik a tuar ding cu mipi an si” tiah a chim.

U Than Soe Naing nih cun “SAC nih bomb an thlak ahcun India ramchungah a tla ko lai. Asinain cucu SAC nih an ṭih lai lo. A ruang cu India ramchung i bomb a tlak hmanh ah India nih mawhchiatnak bia a chim luklak lai i zeihmanh a tuah lai lo ti an theih” tiah a chimchap.

SAC nih CNF hmunpi kap an timh timi hi SAC ṭanhtu media Telegram Channel ah cunglei in Camp Victoria an lakmi hmanthlak he an tar i an lungtlinnak an langhter. Cu lawng si loin Kalay vanlawngbual ah raldohnak vanlawng pahnih timhcia tein an chiah cang tiah theih a si. Cucaah Camp Victoria hi an kah te lai ti hi zumh a um ko!

CNF chimnak nawlngeitu Salai Htet Ni nih cun “Vanral i vennak kan ngei lo. Vanlawng le hriamngan in kahnak i runvennak kongah kan tha a der. Zeitindah kan i thuhnawh lai. Mi sawhsawh si hna seh, hiamtlai si hna seh a si khawh chungin i timhtuah cu kan hau” tiah The Irrawaddy News ah a chim.
Cu ruangah SAC nih Camp Victoria hi kap hna seh law dohthlennak ralkap hna lawng si loin mipi zong kan tuar ngaingai lai ti a fiang. Cucaah i thuhnak khur (bunker) kan i cawh cio ah a ṭha, a si khawh ahcun khua he aa hlat deuhnak ah hmunhma ṭha tein i ser cio ding a si. I ralrin le a hlankan in i timhtuah chung tlukin a ṭhami a um lo.
Cherhchan: CNF ဌာနချုပ်ကို စစ်ကောင်စီ ဗုံးကြဲဖို့ ကြံရွယ်နေသလား (The Irrawaddy News)
Salai CP Lian
CEO, The Chin Post

Relchap>>>>SAC Nih PDF Na Bawmh Hna Tiah An Tlaihmi Khanti Minu Cu Kum 10 Thong Thla Ding In Bia An Chah Piak
==================
PDF sinah Kpay in tangka kyats 5,000 na bawmh hna tiah Khanti minu Aye Thiri cu SAC ralhrang lei nih sual an phawt hnu ah nizan November 22 ah kum 10 thong thlak ding in bia an khiahpiak, tiah theih a si.

Tangka na bawmh hna tiin SAC kuttang pengkomh sakhan hmu Aye Kyaw le a kuttang rianuantu hna nih an rak tlaih hi a si i, nizan November 22 ah kum 10 thong thlak ding in bia an khiahpiak. “Biaceih zung sang deuh ah phakpi ding in timhtuahnak kan ngei ko nain tangka tam tuk kan dih lai,” tiah Aye Thiri a chungkhat pakhat nih a chim.

Aye Thiri cu Khanti khua amah umnak inn ah a luancia Febuary 21 ah SAC ralkap nih an rak tlaih i Khanti pengkomh sakhan ah thla 9 chung an hren hnuah nizan November 22 ah bia khiahnak an tuah piak hi a si.
Kum 27 a simi Aye Thiri cu mingandam lo a si pinah an rak tliah lio zong ah a lung a mit i lutaw hngal loin a rak um caah kan thin a phang ngai ko, tiah a chungkhar pakhat nih cun a chim.

Relchap>>>>>SAC Van Ralkap Thazang Cuanhnak: Cunglei Kahdohnak Nih Teinak Caah Bia A Khiak Lai Lo
======================
SAC nih biatak tein cunglei kahdohnak tuah an i timhmi kong cu kan ṭial pah lengmang cang. Camp Victoria kah an timhmi kong zong CHRO nih an Twitter ah an ṭialmi chirhchan in The Chin Post zong nih kan langhter cang. Tanglei kahdohnak ah a sung pengmi SAC nih cunglei kahdohnak dah ti lo bochan ding an ngei ti lo. Cucaah SAC van ralkap thazang kan theih tawk ka rak langhter!

SAC nih MIG – 29, JF – 17, Nanchang Q5, Chengdu J7 le Shangyan J6 hi 83 an ngei. Raldoh cawnnak le phun a chia deuhmi vanlawng 29 le bomb thlaknak vanlawng A5 tlawmpal an ngei fawn. Russia ah SU 30 vanlawng paruk le raldoh cawnnak vanlawng 10 an cah i SU 30 pahnih cu a phan cang. Asinain SU 30 vanlawng hi a tonghtham an thiam rih lo. Russia vanlawng khalhthiam hna nih an cawnpiak cuahmah lio hna a si.

China ah JF 17 16 le raldoh cawnnak vanlawng 50 an cah i cucu tuan ah a phan lai tiah zumh a si. Cun hriamnam le thilri dang phawrhnak vanlawng 25, MI 35 Helicopter 9 le zeica paoh ah hman khawhmi vanlawng 70 hrawng an ngei.
SAC van ralkal hmunpi hi 10 a um. Atu tiangah Mingalardon, Hmawbi, Taungoo, Meikhtila, Magwe le Thadaoo van ralkap hmunpi in cunglei kahdohnak hi an tuahmi a si. Bomb an thlak tawnmi Pond 500 a ritmi an si. Pond 1,000 a ritmi hi voihnih thum cu an hman ve. Miakpi kuanfang a hmemi phun le 30 mah-mah seh meithal zong an hman ngai.

A cunglei hi SAC van ralkap thazang kan theih khawh tawk a si i mah nakin a tam deuh kho. Asinain a biapi deuhmi cu cunglei kahdohnak nih teinak caah bia a khiak kho lai maw ti hi a si.

Vietnam ral kha 1955 in aa thok i 1965-1975 tiang, kum 10 chung US kha Vietnam ral ah aa tel. Vietnam ral cu Chaklei Vietnam le Thlanglei Vietnam i dohnak a si. Dimawkaresi (Democracy) a duhmi Chaklei Vietnam cu US le nitlaklei ram hna nih an bawmh i Kawmionit (Communist) a duhmi Thlanglei Vietnam cu Kawmionit ram nih an bawmh ve.

Vietnam ral lioah US ralkap nih cunglei kahdohnak an tuahmi zat hi nuai 5 renglo a si i bomb an thlakmi hi ralpi pahnihnak lio i ramkip nih bomb an thlakmi zat nakin a tam deuh ti a si. Vietnam ral lio i US nih vanlawng le hriamngan a hmanmi hna kha, kha lioah cun a ṭhabik timi an si. Asinain US nih cunglei kahdohnak biatak tein a bawmhmi Chaklei Vietnam cu April 30, 1975 ah ral an sung diam ko.

October 7, 2001 ah aa thok i August 30, 2021 ah a dihmi, kum 20 chung a raumi Afghanistan ral lio zongah US le a hawikom ram hna nih cunglei kahdohnak an bawmh. Hriamnam ṭhaṭha an hman. Afghanistan ral ah tangka an hmanmi dihlak US Dollar trillion tiang a phan. Asinain Taliban nih Afghanistan cu an lak ko.

Vietnam ral ah siseh Afghanistan ah siseh US nih hriamnam ṭhaṭha hmangin cunglei kahdohnak an bawmh hna nain an sung ko. US nakin a zeilei paoh ah a niam deuhmi SAC nih cunglei kahdohnak an tuahmi hi zeimawzat cu a bawmh khawh hna lai nain teinak caah biakhiaktu a si lem lai lo. A biapi mi cu mipi le dohthlennak ralkap hna hi ralṭha le lungrual tein i funtom a si. Mipi thazang hi SAC van ralkap thazang nakin a ṭhawng deuhmi a si.
Salai CP Lian
CEO, The Chin Post

Be the first to comment

Leave a Reply

Your email address will not be published.


*